Егерме дүрт елга сузылган бәхет... Аларның гаилә тормышын, мөгаен, менә шушы кыска гына бер җөмлә белән дә тасвирлап буладыр. Диләрә ханым ире – Россиянең атказанган, Татарстанның халык артисты, виртуоз гармунчы Рөстәм Вәлиев язган хатларның һәммәсен яттан белә бугай. Хатлар... Аларның кайсы аэропортта язылган, кайсысы кунакханәнең шыксыз бүлмәсендә, сәхнә артында, фатирга керткән Катя түтәй почмагында, юлда, автобус туктаган арада... Һәр җөмләсеннән киләчәккә булган якты өмет ташый, якын итү, ярату һәм, әлбәттә, сагыну саркый. Рөстәмнең Диләрәгә язган хатларын укыйк...
