Хәзерге татар гарәби язу сәнгатендә тугра жанры Тугра сүзе, тугра термины татар сынлы сәнгате тарихында, сәнгать белгечләренең тикшерүләрендә үткән йөзнең 90 нчы еллары башында гына күренә башлады. Бу сүз совет чорында чыккан сүзлекләрдә — ни рус, ни татар телендә күренмәде. Бары тик революциягә кадәр басылган Евфрон-Брокгауз сүзлегендә генә әлеге терминга аңлатма бирелгән иде. Ә гарәп һәм фарсы сүзлекләрендә бу термин, гәрчә ул төркиләрдән кергән алынма сүз булса да, урын алган иде.