Уйламыйм гына. Дөресрәге, ничек тә уйламаска тырышам. Югыйсә, шунда ук күзләремә мөлдерәп яшь тула, тамагыма йотып булмаслык авыр төер утыра. Ана белән баланы бәйли торган кендек җебе ничә тапкыр өзелә икән?! Ул карынымда ятканда безне бербөтен итеп тоткан кендек җебен әйтмим әле мин. Күзгә күренеп тормаган, бары йөрәк, күңел, җан белән генә тоеп булган җепләр турында сүзем.
