«Галиәсгар Камал» корабына утырып, Рәдиф Гаташ «диңгезләренә» сәяхәткә чакыралар

Син кайсы миф герое? Без әкиятләрне дә, мифларны да бүгенге тормышка – көндәлек шартларга бернинди катнашы булмаган борынгылык калдыгы буларак кабул итәргә ияләшеп киләбез. Әмма аларның сюжетлары һәрберебезнең тормышында көн дә диярлек кабатлана. Без бары уйланмыйбыз гына. Бу хакта.

Рәдиф Гаташ шигъриятендәге төп лейтмотив әнә шул – адәм баласының туганнан башлап гомер буена дәвам иткән Сәяхәте – Одиссеясы.

«Одиссея: Рәдиф Гаташ диңгезләренә сәяхәт» шигъри-музыкаль спектаклендә Гаташ поэзиясе – этәргеч кенә. Һәркемгә үз язмышы, низаглары, уңышлары, табу-югалтулары, ахыр чиктә, тормыш мифопоэтикасы турында уйланыр өчен. Кем син – Зевс әмеренә яисә күптәнге күрәзәгә буйсынып юлга чыккан Одиссеймы, сөйгән ярын гомере буена зарыгып көтүче Пенелопамы, сер бирмәс Ахиллмы? Ишек артында – шаулап торган 60нчы еллармы, яңа XXI гасыр башымы? Эпохалар алышынып тора, ә ни дә булса үзгәрәме?

Спектакльнең тагын бер үзенчәлеге: Рәдиф Гаташ сүзләренә язылган ретро җырларның яшь музыкантлар һәм җырчылар тарафыннан яңача, заманча башкарылуы. Чорлар, язмышлар, иҗади аһәңнәр бәйләнеше.

Сәяхәткә алып чыгачак «Галиәсгар Камал» корабы 21 апрельдә 19:00 сәгатьтә Татарстан урамы, 1 причалыннан кузгала. Сезнең урыннар - «Кече сәхнә» палубасында.

Чараны оештыручылар әнә шулай шаян рухта үзләренә ияртеп, Рәдиф Гаташ иҗатына чумдырмакчы.

Корабта бу сәфәрне бизәргә җыелачаклар: Артем Пискунов, Резедә Сәләхова, Зөлфәт Закиров, Илфак Хафизов (К.Тинчурин театры артистлары), Никита Жестков (бию), Эльмир Низамов, Миләүшә Хәйруллина (фортепиано), Анна Антонова (виолончель), Динә Закирова (скрипка), Алмаз Ахунов (баян), Айгөл Хәйри, Илүсә Хуҗина, Зөлфирә Шәйдуллина, Алмаз Хәсәнов (җырчылар), Juna төркеме, Казан дәүләт университетының Халыкара мөнәсәбәтләр институты студентлар хоры (җитәкчесе - Эльнар Байназаров). Режиссер – Резеда Гарипова.

Бу хакта «Калеб» яңа буын җыена хәбәр итә һәм спектакльгә керү – бушлай.

Белешмә өчен. «Калеб» – һәр төрле юнәлештә иҗат итүче яшьләрне – композиторлар, шагыйрь, рәссамнар, режиссерларны берләштергән проект. Проект яшьләрнең иҗатын таныту, хезмәттәшлек өчен мәйдан булдыруны максат итә. «Калеб» кысаларында иҗади очрашулар, мастер-класс, концерт, лекция, дискуссияләр уздырыла. Проект эшли башлаган көннән, 2013 елның апреленнән бирле 30дан артык чара оештырылган.