Татарстанның халык артисткасы, республиканың атказанган сәнгать эшлеклесе Луара Шакирҗанның «Үзем өчен генә...» дигән китабы басылып та чыкты, бик тиз генә таралып та бетте! Анда Луараның яшьлектә язган шигырьләре, тәрҗемәләре урын алган. «Үзем өчен генә язган күңел дәфтәре, куен дәфтәре... Безнең үсмерлек чорында – мәктәп елларында алар «мода»да иде. Күңелдә бөреләнгән тәүге хис-тәэсирләрне язудан башлана иде ул халәтеңә туры килгән шигырьләрне... Мөлдерәп каядыр түгеләсе килгән кичерешләрне язулардан тула иде ул дәфтәр битләре... Ә яшьлектәге күңел дәфтәрен кабат бер актару яшьлеккә кайтып килү кебек...» – ди ул китапка кереш сүзендә. Марина Цветаева, Анна Ахматова, Белла Ахмадуллиналар шигърияте белән илһамланып, алар фикерен, аһәңен үз йөрәге аша үткәреп, зур шагыйрә булып китәсе Лена апасына (Лена Шагыйрьҗан) ияреп, үзе дә сөю, сагыну, сагыш, моң тулы шигырьләр яза.
