Чәчне чайкау өчен кычыткан: төнәтмәне ничек әзерләргә һәм ничек дөрес кулланырга?

Аның составында витаминнар, минераль матдәләр, органик кислоталар һәм антиоксидантлар бар. Шуңа күрә күпләр аны баш тиресен карау һәм чәчне ныгыту өчен файдалана.
Кычытканның чәч үсешен сизелерлек тизләтә яки чәч коелуны туктата алуын раслаучы фәнни дәлилләр әлегә җитәрлек түгел. Шулай да бу үсемлектән әзерләнгән төнәтмә гадәти чәч тәрбиясенә яхшы өстәмә була ала.

Кычытканның чәч өчен файдасы
Даими кулланганда кычыткан төнәтмәсе:
•    баш тиресен яңарта;
•    майлылык хисен киметергә ярдәм итә;
•    ярсыну һәм аллергия булмаган очракта баш тиресен тынычландыра;
•    чәч каралганрак күренә.
Кайбер кешеләр, кычыткан белән чайкаганнан соң, чәч матур булып  ялтырап тора һәм озаграк чиста булып күренә диләр. Әмма мондый нәтиҗә һәркемдә төрлечә булырга мөмкин.

Нинди кычыткан кулланырга?
Төнәтмә әзерләү өчен яңа өзелгән дә, киптерелгән кычыткан да ярый.
Кычыткан яфракларын гадәттә яз көне җыялар, әмма чәчне чайкау өчен чәчәк ата башлаганчы җыелган кычытканны да кулланырга була.
Әгәр кычытканны  үзегез җыю мөмкинлеге булмаса, даруханәдә сатыла торган киптерелгән кычыткан да ярый.

Төнәтмәме, әллә кайнатмамы?
Өй шартларында икесе дә кулланыла.
Төнәтмә кайнатмыйча әзерләнә: яфраклар өстенә кайнар су салалар һәм берникадәр вакыт төнәтәләр. Бу ысул йомшаграк санала.
Кайнатма исә кычытканны кыска вакыт кайнату юлы белән әзерләнә. Ул тизрәк әзер булса да, югары температура тәэсирендә биологик актив матдәләрнең бер өлеше таркалырга мөмкин.
Кайсысын сайлау – сезнең ихтыярда.

Кычыткан төнәтмәсен ничек әзерләргә?
Яңа өзелгән яфракларны кулланганчы яхшылап юарга кирәк.
Куе төнәтмә әзерләү өчен кирәк булачак:
•    яңа кычыткан – якынча өч төп кечкенә яшь үсемлек;
•    150 мл кайнап чыккан су.
Әгәр киптерелгән кычыткан кулланылса, 100 мл суга якынча бер аш кашыгы чимал җитә.
Яңа яфракларны, кулны какламасын өчен, перчатка киеп вакларга киңәш ителә.
Кычыткан өстенә кайнап чыккан су салыгыз, капкач белән каплагыз һәм 12–24 сәгать төнәтергә калдырыгыз. Моның өчен термос куллану уңайлырак, чөнки ул җылылыкны яхшырак саклый.
Төнәтелгәннән соң сыеклыкны сөзәргә кирәк.

Кычыткан төнәтмәсне ничек кулланырга?
Әзер төнәтмәне сиптергечле савытка салыгыз һәм чәчне юганнан соң, чәчне аралап, баш тиресенә сиптерегез.
Аннан соң баш тиресен берничә минут дәвамында сак кына массажлагыз.
Җиңел массаж үзе дә баш тиресендәге кан әйләнешен яхшырта һәм процедураны рәхәтрәк итә.
Беренче тапкыр кулланганда төнәтмәне озак тотарга кирәкми. Аны 30–40 минутка калдырып, аннары җылы су белән юып төшерү җитә.
Әгәр баш тиресе яхшы кабул итсә, тәэсир итү вакытын акрынлап арттырырга мөмкин.

Чәчне кычыткан белән чайкаргамы?
Кайберәүләр төнәтмәне баш тиресенә генә сөртмиләр, аның белән бөтен чәчне чайкыйлар. Әмма бу ысул һәркемгә дә туры килми.
Коры чәчләрдә кычыткан кайчак корылык хисен тагын да көчәйтергә мөмкин. Шуңа күрә мондый төр чәч ияләренә төнәтмәне бары тик баш тиресенә генә сөртергә киңәш ителә.

Кычыткан чәч төсен үзгәртә аламы?
Ачык төстәге чәчле кешеләргә кычыткан белән сак булырга кирәк.
Куе кычыткан төнәтмәсе, бигрәк тә даими кулланганда, чәчкә җиңелчә яшелсу яки зәйтүн төсмере бирергә мөмкин.
Мондый куркынычны киметү өчен:
•    куелыгы кимрәк булган төнәтмә әзерләргә;
•    аны ромашка төнәтмәсе белән кушарга;
•    төнәтмәне бары тик баш тиресенә генә кулланып, чәчләргә тидермәскә мөмкин.

Сизгерлеккә тест үткәрергә онытмагыз
Табигый булуына карамастан, кычыткан һәр кешегә дә бертөрле тәэсир итми.
Беренче тапкыр кулланганчы төнәтмәнең аз гына күләмен беләкнең эчке ягына яки колак артына сөртегез һәм берничә сәгать көтегез.
Әгәр кычыту, кызару, яндыру хисе яки башка билгеләр барлыкка килсә, төнәтмәне кулланырга ярамый.