Карбыз организмны чистартамы?

 Карбыз организмнан токсиннарны чыгара
Чынлыкта исә безнең организм көн саен үзеннән-үзе чистарынып тора. Бу эшнең төп өлешен бавыр, бөерләр, эчәкләр, үпкәләр һәм тире башкара.
Карбыз «шлакны чыгара» яки «организмны чистарта» алмый. Бүгенге көндә мондый нәтиҗәләрне раслаучы фәнни дәлилләр юк.

Әмма карбызның файдасы бар!

Һәм ул чыннан да игътибарга лаек.
1. Организмдагы су балансын сакларга ярдәм итә
Карбызның якынча 90-92 проценты судан тора. Эссе көннәрдә ул гадәти эчәр суга яхшы өстәмә булып тора һәм организмдагы сыеклык югалтуын тулыландырырга ярдәм итә.

2. Ликопинга бай
Карбызда ликопин күп. Бу - помидорда да булган табигый антиоксидант.
Ликопин күзәнәкләрне оксидлашу стрессыннан сакларга ярдәм итә һәм йөрәк-кан тамырлары системасы сәламәтлегенә уңай йогынты ясый.

3. Витаминнар һәм минераллар чыганагы
Карбызда С витамины, аз күләмдә А витамины, калий һәм башка файдалы матдәләр бар. Алар иммун системасының нормаль эшчәнлегендә катнаша һәм организмдагы су-тоз балансын сакларга ярдәм итә.

4. Калориясе аз
100 грамм карбызда якынча 30 килокалория генә бар. Шуңа күрә ул күпчелек кешеләр өчен җәйге десертның яхшы варианты булып санала.

Карбызны ашаганда чикләүләр бармы?
Файдалы булуына карамастан, карбызны чамадан тыш күп ашарга киңәш ителми.
Аның составында табигый шикәрләр бар, шуңа күрә зур порцияләр рациондагы углеводлар күләмен сизелерлек арттырырга мөмкин.
Бигрәк тә шикәр диабеты яки углеводлар алмашы бозылган кешеләргә чаманы белү мөһим. Алар өчен карбызның уңайлы порция күләмен табиб яки диетолог белән киңәшләшеп билгеләү яхшырак.

Карбыз – организмны «чистарту чарасы» түгел, ә тәмле һәм файдалы сезонлы ризык.
Ул организмдагы су балансын сакларга ярдәм итә, антиоксидантлар белән тәэмин итә һәм эссе көннәрдә сусауны бик яхшы баса, хәлне җиңеләйтә.
Шуны онытмагыз: сәламәтлек бер генә продуктка түгел, ә тулаем тормыш рәвешенә бәйле. Төрле һәм балансланган туклану, җитәрлек күләмдә су эчү, даими хәрәкәт һәм тулы ял - сәламәтлекнең төп нигезе.

1. Карбызны ничек дөрес сайларга?

    • Өлгергән карбызның кабыгы ялтырап тормый. 
    • Ян-ягындагы сары тап зуррак һәм ачык сары төстә булса, карбыз өлгереп җиткән була.
    • Сабы бераз корырак булырга мөмкин.
    • Кул белән шакыганда яңгыравыклы, тонык булмаган тавыш ишетелә.
      
2. Карбызны ничек сакларга?
Киселмәгән карбызны бүлмә температурасында сакларга мөмкин. Ә киселгән карбызны исә азык-төлек пленкасы белән каплап яки ябыла торган савытка салып, суыткычта тотарга кирәк. Аны 3-5 көн эчендә ашап бетерергә кирәк.

3. Карбызны кайчан ашау яхшырак?
Карбызны төп ашаулар арасында яки десерт урынына ашау уңайлы. Берьюлы бик күп күләмдә ашау кайбер кешеләрдә эч күперү яки уңайсызлык тудырырга мөмкин.

4. Карбыз орлыклары файдалымы?
Карбыз төшләрендә үсемлек аксымы, файдалы майлар, магний һәм тимер бар. Ялгыш берничә төш йоту сәламәтлек өчен куркыныч түгел.