Галимә, шагыйрә, Саҗидә Сөләйманова исемендәге премия лауреаты Рәзинә Мөхияр иҗаты укучыларга «Нәрсә булды миңа?», «Асылыма кайтам», «Күңел тәрәзәләрем» китаплары аша яхшы таныш. Шигырьләре хатын-кызларга хас ихласлыгы, җылылыгы белән күңелләрне яулый. Тирән фәлсәфә дә, сагыш-моң да, ярату да, өмет тә түгелә алардан. Шигъри юлларыннан ук тел, милләт сагында торучы, халык язмышы өчен борчылучы, «кирәк чакта имән мин», дип кистереп әйтә белгән Рәзинәне таныйбыз. Игътибарыгызга шагыйрәнең яңа шигырьләрен тәкъдим итәбез.
