«Йөри алмас», ди аны табиблар. Ә ул 4 яшендә аягына баса. «Укый алмас», диләр – мәктәпне яшьтәшләре белән бер елны «с отличием» тәмамлый. Язмышның нияте аны дүрт стена арасына бикләү булгандыр, ләкин ул бу киртәләрне җимереп чыга. Язмамның герое Марат КАДЫЙРОВ бүген Казан шәһәренең Киров һәм Мәскәү районнары инвалидлар оешмасын җитәкли. «Актив гаилә» ассоциациясе рәисе. Җәмәгать эшлеклесе. Депутат ярдәмчесе. Музыкант. Борынгы сәгатьләрне төзәтә белүче сирәк оста. Хатыны Алинә белән ике кыз үстерәләр. Ә иң мөһиме – гаҗәеп миһербанлы йөрәк иясе ул.
