Сезгә Коръәнне Камил хәзрәт Сәмигуллин үзе укый

Безнең редакциядә бүген көне буе изге Коръән аятьләре яңгыраячак. Татарстанның Диния назәрәте рәисе, мөфти Камил хәзрәт Сәмигуллин бүләге ул. Бер безгә генә түгел, барлык мөселманнарга да бик зур һәм олуг бүләк ясаганнар – изге Коръәнебезне аудиоязмага яздырып, диск итеп бастырып чыгарган алар. Алар дигәнем – «Хозур» нәшрият йорты һәм мөселманнарның «Азан» радиосы. Аятьләрне Камил хәзрәт үзе укый. Укылышның дөреслеген һәм хата-кимчелекләрен Бөтендөнья Коръән хафизлар әзерләү оешмасы рәисе шәех Хәсән Хади тикшергән. Ике дисктан торган язма төп-төгәл сигез ай буена яздырылган. «Бик авыр хезмәт булды, – ди Камил хәзрәт, журналистлар белән узган бүгенге матбугат конференциясендә. – Тавыш белән эшләү кыен икән. Тавыш беткәннән халык ысулларын кулланырга да туры килде. Кайсыбер көннәрдә хәтта сөйләшә дә алмас була идем». Бу ике дискка тулы Коръән сыйган. Дөньяда мондый язмалар күп булса да, Россия мөфти-хафизы укыганы беренчесе. Ул 1 мең данәдә яздырылган, күбесе бүләк ителәчәк, калганы «Хозур» нәшрият йорты аша сатылачак. Бәясен әлегә төгәл генә әйтмәделәр.