Икенче ашлар
Филүс Каһировтан баскча пешерелгән тавык
Филүс Башкортстанның Бүздәк районы Килем авылында туып-үскән егет.
Аш-су әзерләү серләренә студент елларында өйрәнгән. Моңарчы авыз итмәгән ят ризыклар пешерергә, башка халыкларның кухняларына күз салырга ярата ул. Филүснең бүген безгә тәкъдим итә торган ризыгы да, Франция, Испания якларында яратып әзерләнә икән. Сез дә пешереп, авыз итеп карагыз әле, сезгә дә ошар ул.
Кирәк:
* 4 тавык боты;
* 1 зур болгар борычы;
* 2-3 зур помидор;
* 1 баш суган;
* 1 кишер;
* тоз-борыч.
Эш барышы:
Тавыкның бот өлешен урталайга бүлеп (артык зур булмаса, бүлмәсәң дә ярый), үсемлек мае салынган табада һәр ягын да кыздырып алабыз.
Икенче бер табада ярым боҗралап туралган суганны алтынсу төскә кергәнче кыздырабыз. Шуның янына саламлап туралган кишер салабыз. Кишер йомшаргач, озынча итеп туралган болгар борычын өстибез.
Кызган яшелчәләр янына кабыгы салдырылган помидорларны турап салабыз, тоз-борыч сибәбез. Капкач белән каплап, сүрән утта 10 минут томалап тотабыз.
Яшелчәләрне тавык ботлары янына кушып, янә 10-15 минут чамасы пешерәбез.
Тавык янына өстенә сыр сибелгән бәрәңге әзерлик.
Кирәк:
* 7-8 бәрәңге (яшь бәрәңге булса, бигрәк тә яхшы);
* 100–150 г кибет каймагы;
* 1 тырнак сарымсак;
* 100 г каты сыр;
* тоз-борыч.
Эш барышы:
Бәрәңгене юып, кабыгы белән яртылаш әзер булганчы пешерәбез.
Сарымсакны вак угычтан уып, каймакка кушабыз. Тәменчә тоз белән борыч сибәбез, яхшылап туглыйбыз.
Бәрәңгене бераз суытып, кабыгын әрчибез (яшь бәрәңгенекен әрчемәсәң дә була) һәм урталай бүләбез.
Төбенә аз гына май тамызылган табага бәрәңгеләрне кискән ягы белән өскә каратып тезеп, өстеннән сарымсаклы каймакны ягабыз.
Аның өстенә уылган сыр сибеп, 10-15 минутка 200 градус кызулыктагы мичкә тыгабыз.
Сыр кызаргач, сыебыз әзер.
«Сөембикә», № 6, 2015.
Галерея
Следите за самым важным и интересным в Telegram-каналеТатмедиа
Комментарийлар
0
0
Сез биргән аш-су рецептларын бик яратып кулланам. Үзләре гади генә була алар, үзләренең берәр хикмәте дә була. Менә бәрәңгене дә ничек тәмле итеп, сарымсаклар белән пешереп күрсәткәнсез. Мастер-классларны артистлар әзерләве дә күңелле. Аларны сәхнәдә генә түгел, кухня тирәсендә дә күрүе кызык бит. Рәхмәт бик зур.
0
0
0
0
Лилия белән килешәм. Үзем пешерергә яратмасам да, йолдызларга карап, кухняга тартыла башлыйм. Мин йолдызлардан киммени?!
0
0
0
0
Миңа да артистлар пешергән ризыклар кызык. Тәлинкәләре, пычаклары, савыт-сабалары нинди икән дип, кызыксынып күзәтәм. Бу санда кемне бирерләр икән дип, көтеп торам.
0
0
0
0
Гел тэмле ашап Филус тазарып китэ курмэсен тагы! Сэхнэ матурлар, нэфислэр урыны! Корсак устергэн япь-яшь егетлэрне бер дэ сэхнэдэ курэсе килми. Филуснен зифа буй-сынын саклавын телим. Ижатына сокланабыз, унышлар сина!
0
0