Дөрес туклану

Тавык бавырыннан паштет

Урамда кабат көз. Мондый салкын вакытта берәр туклыклырак, итлерәк ризык ашыйсы килүен истә тотып, без сезгә Лоррейн Паскальнең* тавык бавырыннан сарымсаклы паштет рецептын тәкъдим итәбез. Ул бик йомшак һәм искиткеч тәмле! Аны хәтта тәҗрибәсе булмаган кеше дә пешерә ала.

Кирәк

500 г тавык бавыры;
200 г атланмай;
100 г каймак (сливки);
2-3 тырнак сарымсак;
тәменчә тоз-борыч.

Эш барышы

Табада 100 г атланмайны эретеп, юган һәм суы саркытылган тавык бавырын уртача утта кыздырып алабыз. Озак кыздырырга кирәкми. Әзер бавырга чәнечке белән кадаганнан соң бүленеп чыккан суы үтә күренмәле булырга, ә уртасы алсу төстә калырга тиеш.
Кызган бавырны блендер савытына алып салабыз.
Табада калган майда издерелгән сарымсакны кыздырып, аны да мае белән бергә бавыр янына бушатабыз.
Каймак, тоз, борыч өстәп, барысын бергә блендерда ваклыйбыз.
Калган 100 грамм атланмайны аерым савытта эретәбез.
Паштетны банкага тутырып, өстенә эретелгән атланмайны агызабыз һәм 2-3 сәгатькә суыткычка куеп торабыз.

Паштет әзер! Аны табынга хлебцы яки икмәк телеме, яшелчәләр белән бирергә була. Өстен тимьян яфраклары белән бизи аласыз.

Ашларыгыз тәмле булсын!

_______________________

*Лоррейн Паскаль – Британия моделе, аш-су остасы, кондитер, телевидениедә алып баручы һәм кулинария буенча иң күп сатылган китаплар авторы. Китапларының гомуми тиражы Бөекбританиядә генә дә миллионнан артып китә.

Фото ясалма фәһем ярдәмендә ясалды.