Кабактан запеканка

• Кабакта А һәм С витамины, ашкайнату процессына уңай йогынты ясый торган клетчатка һәм иммунитетны яхшыртучы аминокислоталар бар.
• Кабак матдәләр алмашын тизләтә, шуңа да зифалыгын сакларга теләүчеләр өчен ул алыштыргысыз булып санала.
• Әфлисун төсен әлеге яшелчәгә бета-каротин бирә.
• Организмда А витаминына әверелеп, күзләрнең күрүен яхшырта, тән тиресен матурлата.
• Кабак составындагы лютеин һәм зеаксантин күзләрдә картаю аркасында килеп чыга торган үзгәрешләрне тоткарлый.
• Кабак калий, магний һәм цинкка бай. Үз чиратында, алар йөрәк эшчәнлегенә ярдәм итә, кан басымын нормада тотарга һәм матдәләр алмашын яхшыртырга булыша.
• Клетчатка исә эчәклек эшчәнлеге өчен җаваплы.

Кабактан күп ризыклар әзерләргә була. Бу юлы без сезгә кабак запеканкасы әзерләп карарга тәкъдим итәбез.

Кирәк

• (18 сантиметрлы зур булмаган таба өчен)
• 400 г пешереп изелгән кабак
• 300 г сөт
• 50 г атланмай
• 1 йомырка
• 50 г дөге оны (башка төрле он да ярый)
•  50 г балландыргыч (без эритрит кулландык)
• 1 чәй кашыгы камыр көпшәкләндергеч
• чәй кашыгы ярым кабак бәлеше өчен тәмләткеч*
• ванилин
• бер чеметем тоз

Эш барышы

• Кабакны бөтен килеш мичтә пешереп, суынгач чистартабыз һәм блендерда издерәбез.
• Издерелгән кабакны иләккә салып, артык суыннан арындырабыз.
• Запеканка өчен кирәк булган барлык ингредиентларны издерелгән кабакка кушып, блендер белән яхшылап туглыйбыз.
• Таба төбенә пергамент кәгазе җәеп, камырны бушатабыз.
• Запеканка 190 градуслы мичтә 1 сәгать чамасы пешә.
• Суынган запеканканы 5 сәгатькә суыткычка тыгып торабыз.
• Табынга аны салкын килеш чыгаралар.
• Тагын да туклыклырак булсын дисәгез, запеканканы уалып торган камыр (песочное тесто) өстенә салып пешерә аласыз.

* Кабак бәлеше өчен тәмләткеч болай ясала: берәр чәй кашыгы төелгән имбир, мөшкәт чикләвеге, дарчин, хуш исле борыч, канәферне бергә катнаштыралар. Әлеге тәмләткечләрне кофетарткыч яки блендер белән вакларга була. Кибеттә әзер катнашма да сатыла.