Тол калу... Ир-ат өчен моннан да авыррак сынау бар микән? Хатының синең мәхәббәтең, өйгә ямь бирүче, гаиләне бер йодрыкта җыеп тотучы гына түгел, ә фикердәшең, зур эшләр белән янарга рухландыручың да булса... Җитмәсә, балалар булса, алар «әни» дип сагынып еласа... «Түзә икән йөрәк. Тормыш, моңа кайгы килде әле дип, туктап та калмый икән», – ди «Риваять» этно-төркеме җитәкчесе Руслан ГАБИТОВ. Моннан биш ел элек хатынын югалтып, өч баласы белән ялгыз кала ул. Русланның үзен тыңлыйбыз.
