«Әниләр клубы» проекты үз эшчәнлеген «Сөембикә» журналы белән берлектә башлап җибәрде. Беренче очрашуда әниләр малайлар сәламәтлеге турында сөйләште. Клубның кунагы – ТР һәм РФ атказанган табибы, Республика клиник балалар хастаханәсенең урология бүлеге мөдире Рәшит Байбиков иде. Табиб елдан-ел «җан җире» белән бәйле авырулар артканлыгын әйтте. Вакытында табибка мөрәҗәгать итмәү зур проблемалар китереп чыгарырга мөмкин. Ә ничек ул вакытны белергә?
