15 гыйнвар 2024 яңалыклары

Татар гаиләсе яшәгән йорт әллә каян күренеп тора. Тәрәзә төбендә күкрәп яраннар үсә аның. Без яраткан кебек, яран гөлне башка тагын бер халык яратамы икән? Әгәр яран үстерергә теләп тә, әлегә кадәр өегездә ул гөл юк булмасы, менә хәзер орлыгын чәчәр өчен нәкъ вакыты. Әйе, яран гөлне орлыктан да чәчеп үстерәләр.

Менә Яңа еллар да үтеп китте. Инде аны кемнең кайда, ничек каршы алганын да сөйләшеп бетереп, көндәлек мәшәкатьләребезгә чумдык. Күпләр өчен Яңа ел – көтеп алган могҗизалы бер бәйрәм. Гаилә бәйрәме дибез без аны. Ә кемдер аны дуслары белән каршы алгандыр. Менә бер танышымны да хезмәттәше Яңа елны үзләрендә каршы алырга чакырган булган. Ник барганына әле дә үкенеп бетә алмый. «Моның кадәр беркайчан да кимсенгәнем булмады», – ди ул.