Помидор согы: нәрсәсе белән файдалы, кемгә зыян китерергә мөмкин һәм аны өйдә ничек әзерләргә?

Аны тәме, калориясе аз булуы һәм төрлечә кулланырга мөмкинлеге өчен яраталар: кемдер аны шул килеш кенә эчә, кемдер тоз, борыч яки яшел тәмләткечләр өсти. Әмма помидор согын тәме өчен генә түгел, ә бай составы өчен дә үз итәләр.

Помидор согы нәрсәсе белән файдалы?

• ликопин – табигый антиоксидант;
• С витамины;
• А витаминының алшарты – бета-каротин;
• клетчатка;
• органик кислоталар;
• калий, магний һәм башка минераллар;
• углеводлар һәм аз күләмдә үсемлек майлары бар.

Организм өчен мөмкин булган файдасы

Помидор согын даими куллану түбәндәге файдалы нәтиҗәләргә ярдәм итә ала:

• организмны А һәм С витаминнары белән тәэмин итә;
• иммун системасының нормаль эшчәнлегенә ярдәм итә;
• организмга антиоксидантлар, шул исәптән, ликопин кертә;
• эчәклекнең нормаль эшләвен тәэмин итә;
• чагыштырмача аз калорияле булуына карамастан, туклык хисен озак саклый;
• көндәлек туклану рационын төрләндерә.

Кайбер тикшеренүләр шулай ук помидор һәм аннан әзерләнгән продуктларны куллануның йөрәк-кан тамырлары системасы сәламәтлегенә уңай йогынты ясарга мөмкинлеген күрсәтә. Бу, аерым алганда, алардагы ликопин һәм калий булуы белән бәйле. Әмма помидор согын авыруларны кисәтү яки дәвалау чарасы буларак карарга ярамый.

Помидор согы куллануны кайчан чикләргә кирәк?

Файдалы үзлекләренә карамастан, помидор согы һәркемгә дә туры килми.
Түбәндәге очракларда сак булырга кирәк:

• помидорга аллергия булганда;
• ашказаны җәрәхәте (язва) көчәеп киткән вакытта;
• кислоталылыгы югары булган гастритның ачык чагылышлары вакытында;
• ашказаны-эчәк трактының кайбер авырулары булганда, чөнки әчкелтем продуктлар кайбер билгеләрне көчәйтергә мөмкин.

Тоз күләмен дә исәпкә алу мөһим. Кибеттә сатылган помидор согында еш кына тоз шактый күп була, шуңа күрә кан басымыннан интеккәндә, өстәмә тоз кушылмаган сокны сайларга яки аны үзең әзерләргә кирәк.

Өйдә помидор согын ничек әзерләргә?

Өйдә әзерләнгән сок аның составын үзең контрольдә тотарга мөмкинлек бирә һәм артык консервантларны үз эченә алмый.
Кирәкле ингредиентлар
1,5 кг өлгергән помидор өчен:

• шикәр – 15 г;
• тоз – 3 г.

Теләк буенча яраткан тәмләткечләрегезне дә өстәргә мөмкин.
Әзерләү ысулы
1. Помидорларны яхшылап юыгыз һәм эре кисәкләргә бүлегез.
2. Яшелчәләрне сок чыгаргычтан яки иттарткычтан үткәрегез.
3. Барлыкка килгән массаны эмаль кәстрүлгә салыгыз.
4. Кайнап чыкканчы җылытыгыз һәм өстенә җыелган күбекне алып ташлагыз.
5. Тоз, шикәр һәм теләгәнчә тәмләткечләр өстәгез.
6. Кайнап чыккач, сүрән утта тагын 10–15 минут пешерегез.
7. Кайнар сокны алдан стерильләштерелгән банкаларга салыгыз.
8. Стериль капкачлар белән ябыгыз, банкаларны астын өскә әйләндерегез һәм төреп куеп, тулысынча суынганчы тотыгыз.
Суынганнан соң банкаларны салкын һәм караңгы урында саклагыз.

Табигый помидор согы – тәмле һәм туклыклы эчемлек, ул сәламәт туклану рационының бер өлеше була ала. Аның составында витаминнар, минераллар һәм антиоксидантлар бар, ә калориясе аз булу сәбәпле, туклануына игътибар иткән кешеләр өчен дә уңайлы.
Иң яхшы вариантларның берсе – өйдә әзерләнгән сок яки тоз һәм шикәр артык күп булмаган кибет согы.

Әгәр ашказанының хроник авырулары, помидорга аллергия яки башка медицина чикләүләре булса, помидор согын даими куллана башлаганчы табиб белән киңәшү яхшырак.