Кухнядагы иң шәп гадәтләр

Ашаганнан соң ук табак-савыт юу 
Юынгычта  кичтән юылмый калган савыт-сабалар булуы, килешерсез, иртән күңелне төшерә. Ә кичтән юып куйсагыз, иртәнге  10–15 минутны экономияләчәк. 
Нишләргә: Ашаганнан соң 7 минутлык таймер куегыз. Музыка, подкаст куеп савыт-сабаны юып алыгыз – вакыт сизелмичә үтәчәк.

Тоз, шикәр һәм тәмләткечләрне уңайлы савытларда саклау
Пакетлар ертыла, тузанлана, югала. Ә пөхтә пыяла банкалар – кухняга тәртип өсти.
Нишләргә: Матур банка җыелмасы алып, аларны тоз-шикәр белән тутырыгыз.

Өстәлне ялгызыгыз өчен дә сервировкалау
Табактан  ашау – бер дә күңелле күренеш түгел, ашавыгызның да яме булмаячак. Һәркем сервировкаланган өстәлдә утырып ашарга лаек. Моны гадәткә кертергә генә кирәк. 
Нишләргә: «тиз җыела торган кечкенә өстәл җыелмасы» булдырыгыз – салфетка, стакан, тәлинкә, кашык-чәнечке. 20 секунд – һәм сервировкаланган өстәл әзер.

Кичке ашны телефонсыз үткәрү
Гаджетлар өстәл янындагы җанлы аралашуны үтерә. 20 минут кына телефоннан башка булу – гаилә җылысын кайтара.
Нишләргә: кухняга телефоннар өчен кечкенә тартма куегыз. Беренче  булып телефонын куйган кеше сөйләшү темасын сайлый дигән кагыйдәне бонус итәргә була.

Иртән 5 минутка кухняны җилләтү.
Пешкән ризык исе һәм тынчу һава – баш авыртуының беренче сәбәбе.  
Нишләргә: чәйнек кайнап чыкканчы гына тәрәзәне ачып торыгыз.

Кухня өстәленә атнасына бер мәртәбә чәчәк кую
Ул бер чәчәк кенә булса да ярый, барыбер өстәлгә – ямь, күңелгә рәхәтлек  өстәячәк.
Нишләргә: бер генә хризантема ботагы  булса да сатып алырга гадәтләнегез. 

Иртәнге ашны кичтән әзерләп кую
Иртә – иң ашыгыч вакыт. Кичтән әзерләнгән ботка яки киселгән җиләк-җимеш 15 минутыгызны саклаячак.
Нишләргә: кичтән ботканы пешереп куегыз, контейнерга йогурт, җиләк салыгыз. Иртән болгатырга гына кирәк булачак.

Көнне дарчинлы чәй белән тәмамлау
Чәй пешерү үзенчә бер сигнал булсын: «бүгенге эш тәмам». Дарчин исе тынычландыра. 
Нишләргә: дарчин таягы һәм яраткан чәегезне бер тартмада саклагыз. Кич белән бер таяк салып 3 минут тотыгыз.

Кухняда музыка кую
Тынлыкта пешерү – күңелсез, ә музыка белән рәхәтрәк булачак. 
Нишләргә: яраткан музыкагызны куярга гадәтләнегез. 

Йокларга ятканчы кухняны җыеп кую
Иртәнгә чиста кухня – көннең матур башлангычы.
Нишләргә:  «йоклар алдыннан – юылган, сөртелгән, җыелган» дигән кагыйдә куегыз. Боларны эшләгәндә музыка йә берәр подкаст тыңлагыз – эшләгәнегезне сизмәссез дә.