Иң файдалы аш-су киңәшләрен беркайчан да китапларга язып куймыйлар. Аларны әниләр – кызларына, ә кызлары үз чиратында үзләренең кызларына тапшыра. Эш арасында – аш-су әзерләгәндә, кунак көткәндә, чәй өстәле артында...
Бу киңәшләр – еллар дәвамында тупланган киңәшләр. Алар сезнең вакытны, көчне һәм нервларны шактый янга калдырырга булышыр.
Суган турыйсың, ә такта өстәл буйлап әле бер якка, әле икенче якка шуып йөри, пычак та шуып китә. Аз гына киселеп яки тырналып китү белән тәмамланса ярый ла...
Ә чишелеше бик гади: такта астына юеш сөлге җәеп куегыз. Сөлге өстәл өслегенә тыгыз итеп ятачак һәм такта урыныннан кузгалмаячак. Нәрсәдер тиз генә турарга кирәк булса, бу ысулны һәрвакыт кулланырга була.
Кулыңны сабын белән күпме генә юсаң да, сарымсак исе берничә сәгать буе китмичә торырга мөмкин. Әмма моның да гади генә сере бар: салкын су агымы астында уч төбегезне тутыкмый торган корычтан ясалган теләсә нинди әйбергә ышкыгыз.
Моның өчен кашык, пычакның металл өлеше яки хәтта металл раковина да ярый. Ис бик тиз сизелерлек дәрәҗәдә кимәячәк. Бу – гадәти химик реакция.
Моның өчен кәстрүл өстенә аркылы итеп гади агач кашык куегыз – сөт күбеге тиз генә күтәрелеп ташып чыкмас. Кашык сөт өстендәге күперчекләрне күбек күтәрелә башлаган мизгелдә үк тарата.
Яңа пешкән икмәк еш кына бер-ике көн эчендә үк кибеп, катып китә, һәм бу, әлбәттә, күңелне төшерә. Икмәк савытына кечкенә генә алма кисәге салып куегыз – шулай иткәндә икмәк озаграк йомшак булып калыр.
Алма әкренләп дым бүлеп чыгара, шуңа күрә икмәк бик тиз кипми. Әмма алма кисәген вакытында алыштырырга онытмагыз: ул үзе кибә башласа, нәтиҗә киресенчә булырга мөмкин.
Нәрсәдер уарга криәк булса, эш башлар алдыннан угычның өслеген бераз үсемлек мае белән майлап куярга кирәк. Шул вакытта продукт кисәкләре аңа азрак ябыша, ә эш беткәннән соң угычны юу күпкә җиңелрәк була.
Укроп яки петрушка, бигрәк тә зур бәйләм итеп сатып алынган булса, икенче көнгә үк шиңәргә мөмкин. Мондый хәл булмасын өчен, яшел тәмләткечләрне юеш сөлгегә төреп, пакет яки контейнерга салыгыз һәм суыткычка куегыз. Шул рәвешле алар бер атна чамасы, хәтта аннан да озаграк яңа килеш сакланырга мөмкин.
Пакетка берничә кечкенә тишек ясагыз – бу һаваның йөреп торуына ярдәм итә: яшел тәмләткечләр череми, бозылмый.
Кайбер вакытта, мәсәлән, салат өчен яки матур итеп табынга бирү өчен, бәрәңгенең пешкәннән соң да формасын саклап калуы мөһим. Моның өчен суга бераз аш серкәсе өстәгез. Бәрәңге йомшарса да, тыгызрак булып кала һәм тиз генә изелеп таралмый. Зур кәстрүлгә бер аш кашыгы җитә, артыгын салырга кирәкми, югыйсә серкә тәме бик нык сизеләчәк.
Әйткәнебезчә, болар беркайда да язылмаган кечкенә генә хәйләләр, әмма нәкъ менә шундый гади киңәшләр кухнядагы тормышны уңайлырак, җиңелрәк һәм җылырак итә. Иң мөһиме – алар сыналган. Кулланып карагыз, бәлки, сез дә аларны үз кызыгызга яки оныгыгызга сөйләрсез. Гаилә җылысы нәкъ шулай саклана бит: бер-берең белән уртаклашкан кечкенә серләр, гади киңәшләр һәм буыннан-буынга күчеп килгән җылы сүзләр...
Следите за самым важным и интересным в Telegram-каналеТатмедиа
Комментарий юк