Бәхетле булуның 20 сере

Әмма аны ничек үстерергә соң, моңа нәрсә ярдәм итә ала?
Безнең һәркайсыбыз бәхетлерәк булырга тели, хәтта үзен бәхетле дип санаган кешеләр дә. Тагын да бәхетлерәк булырга исә тормышыбызга яңа төсмерләр һәм мәгънәләр өстәп ирешергә мөмкин. Ә ни өчен бәхетлерәк булырга тырышырга кирәк соң? Фәнни тикшеренүләр күрсәткәнчә, кешеләр белән мөнәсәбәтләребездә үзебезне никадәр бәхетле хис итүебез сәламәтлегебезгә турыдан-туры йогынты ясый. 
Ни өчен соң яхшы эшебез, яраткан тормыш иптәшебез, тугры дусларыбыз булса да, күпләр тормыштан канәгать түгел? Ни өчен чын күңелдән шатлану хисен оныта башладык? Һәм иң мөһиме – моны ничек үзгәртергә?

Бу сорауларның һәркем өчен җавабы төрле булырга мөмкин. Әмма бәхетлерәк булу өчен бер гади хакыйкатьне истә тотарга кирәк: озакка сузылган канәгатьлек менә хәзер, шушы мизгелдә яшәргә һәм кечкенә шатлыкларны күрә белергә өйрәнгәндә генә туа. Моның өчен бүген үк кечкенә адымнар ясарга мөмкин.

1. Аңлагыз: акча күп проблемаларны хәл итәргә ярдәм итә, ләкин бәхетне сатып алып булмый
Яңа машина алу, белем күтәрү яки хезмәт баскычыннан үсү өчен акча кирәк. Әмма төп ихтыяҗлар канәгатьләндерелгәч, бәхетне башка нәрсәләрдән эзләргә туры килә. Күбрәк акча һәрвакыт күбрәк бәхет дигән сүз түгел.

2. Кимендә җиде сәгать йоклагыз
Туйганчы йоклау дөрес туклану һәм физик активлык кебек үк мөһим. Җиде сәгатьтән дә ким йокламаган кешеләрнең эш нәтиҗәләре дә яхшырак була.

3. Көн саен берәр кешегә ихлас күңелдән мактау сүзләре әйтегез
Башкаларның яхшы якларын күрә белегез. Җылылыкка җавап итеп сез дә җылылык алырсыз.

4. Аңлы рәвештә яшәргә өйрәнегез
Үткәннәр өчен үкенүләрне һәм киләчәк өчен борчылуларны җибәрегез. Тормыш – ул бүгенге мизгел. Аның кадерен белегез.

5. Һәр көнне файдалы иртәнге аш белән башлап җибәрегез
Көнне организмыгыз турында кайгыртудан башласагыз, көн дәвамында да дөрес туклану җиңелрәк булачак.

6. Яраткан шөгылегезгә вакыт табыгыз
Эш күп вакытны ала. Әмма күңелгә рәхәтлек биргән шөгыльләр дә тормыш өчен кирәк. Аларның файдасы акча белән үлчәнми.

7. Рәхмәтле булырга өйрәнегез
Тормышыгыздагы яхшы вакыйгаларга игътибар итегез. Теләсәгез, рәхмәт әйтерлек мизгелләрне язып барыгыз.

8. Музейга барыгыз, һичьюгы виртуаль рәвештә
Бүген сәнгать дөньясына өйдән чыкмыйча да сәяхәт итеп була. Күргәзмәләрне, концертларны, фильмнарны карагыз. Оскар Уайльд әйткәнчә: «Җаныгызны матур тәэсирләр белән дәвалагыз».

9. Чаманы белегез
Бәхет бер чиктән икенче чиккә ташлануны яратмый. Урталыкны сайлагыз. Нәкъ шул юл күңел тынычлыгына илтә.

10. Камиллеккә түгел, даими кечкенә үзгәрешләргә омтылыгыз
Бәхетнең сере – кечкенә, ләкин өзлексез уңай үзгәрешләрдә.

11. Берәр яңа нәрсә эшләп карагыз
Яңа рецепт буенча ризык пешерегез, гадәттә укымаган жанрдагы китапны укыгыз. Тормыш биргән мөмкинлекләрдән файдаланыгыз.

12. Бер-ике сәгать саен эштән туктап 10 минут ял итегез
Бу сезгә нәтиҗәлерәк эшләргә һәм көн ахырына көчегезне саклап калырга ярдәм итәчәк.

13. Планлаштырган эшләрегезне вакытында үтәгез
Эшне соңга калдыру стрессны арттыра. Вакытында эшләнгән эш күңел тынычлыгы бирә.

14. Яраткан кешеләрегез белән вакытны күбрәк үткәрегез
Бу безне бәхетлерәк итә торган иң мөһим нәрсәләрнең берсе. Моның өчен ешрак очрашырга кирәк, андый мөмкинлек юк икән – видеоэлемтә дә ярый.

15. «Әйе» дип әйтергә өйрәнегез
Яңа мөмкинлекләрдән курыкмагыз. Кайчак иң зур шатлык көтелмәгән урында очрый.

16. «Юк» дип әйтә белегез
Үз өстегезгә артык күп җаваплылык алмагыз: бу стресска китерә.

17. Елмаегыз
Хәтта кәеф булмаса да. Елмаю кәефне күтәрергә ярдәм итә һәм яхшы гадәткә әверелә ала.

18. Ашыкмагыз, туктап уйлагыз
Ачу белән әйтелгән сүзләр дә, уйламыйча ясалган гамәлләр дә соңыннан үкенечкә әйләнергә мөмкин. Башта тирән сулыш алыгыз һәм уйлагыз.

19. Күптән хыялланган эшегезне башлап җибәрегез
Песи алыгыз, гитарада уйнарга өйрәнегез, берәр чит тел үзләштерә башлагыз. Моның өчен иң яхшы вакыт – иртәгә дә түгел, берсекөнгә дә, ә нәкъ менә бүген.

20. Яңа кешеләр белән танышыгыз
Безне чолгап алган кешеләр бәхет хисенә зур йогынты ясый. Бүген танышкан кеше иртәгә иң якын дустыгызга әйләнергә мөмкин.