Банан: файдалы җиңел ризыкмы, әллә...

Берәүләр бананны сәламәтлек өчен идеаль продукт дип саный, икенчеләре исә, шикәр күп булу сәбәпле, ул ябыгырга комачаулый һәм артык авырлык җыярга ярдәм итә дип уйлый.
Бананны көндәлек туклану рационына кертергә кирәкме, әллә аны чикләү хәерлерәкме?

Банан ни өчен шулкадәр популяр?
Бананның төп өстенлеге – аның уңайлылыгы. Аны юарга, пычак белән әрчергә яки суыткычта сакларга кирәкми. Ул һәрчак кул астында булган әзер җиңел ризык.
Моннан тыш, банан организмның энергия запасын тиз арада тулыландыра. Шуңа күрә аны спортчылар, сәяхәтчеләр һәм актив тормыш рәвеше алып баручылар ярата. 
Бананның популярлыгы уңайлылык белән генә аңлатылмый. Аның составында:
• калий;
• В6 витамины;
• С витамины;
• магний;
•    табигый антиоксидантлар бар.
Бананны витаминнарга иң бай җиләк-җимеш дип атап булмаса да, ул туклану рационын яхшы тулыландыра.

Банан чыннан да артык баллымы?
Күпләр бананны артык баллы дип саный һәм автомат рәвештә «продукт татлы икән, димәк ул зарарлы» дип уйлый.
Чынлыкта исә барысы да бераз катлаулырак.
Әйе, бананда табигый шикәрләр – фруктоза, глюкоза һәм сахароза бар. Әмма алар белән бергә организм клетчатка да ала, ә ул углеводларның үзләштерелүен акрынайта. Шуңа күрә бананның кандагы шикәр дәрәҗәсенә йогынтысы конфет, камыр ризыклары яки татлы эчемлекләрнекеннән аерылып тора.
Проблема, гадәттә, бер бананда түгел, ә көнлек рациондагы артык калорияләр күләмендә.

Бананның организм өчен файдасы
Энергия чыганагы
Әгәр сез вакытында ашый алмагансыз, эш көненнән соң арыгансыз һәм тренировкага җыенасыз икән, банан ашап куегыз. Ул энергия запасын тиз тулыландыра һәм ачлык хисен киметергә ярдәм итә.
Мускуллар эшчәнлегенә ярдәм итә
Калий күп булганга күрә, бананны еш кына спортчыларга тәкъдим итәләр. Ул минерал мускулларның нормаль эшләвендә катнаша һәм организмдагы су-тоз балансын сакларга ярдәм итә.
Ашкайнату системасы өчен файдалы
Бананда эчәклекнең нормаль эшчәнлегенә ярдәм итүче азык җепселләре бар. Бу аеруча бераз өлгереп җитмәгән бананнарга кагыла, чөнки аларда файдалы эчәк бактерияләре өчен азык булып торучы резистент крахмал күбрәк була.
Сәламәт һәм уңайлы җиңел ризык
Ул – көндәлек рационга җиңел кертеп була торган гади һәм табигый продукт.

Банан һәм ябыгу: комачаулыймы, әллә ярдәм итәме?
Мөгаен, иң күп бәхәс уята торган сорау нәкъ менә шушыдыр.
Кайбер диеталар бананны калорияле булганы өчен бөтенләй рационнан чыгарырга киңәш итә. Әмма туклану турында заманча фәнни карашлар башкача сөйли.
Үзе генә банан артык авырлык җыйдырмый. Артык килограммнар кеше даими рәвештә энергиясен сарыф иткәненнән күбрәк калория алганда барлыкка килә. Әгәр рацион балансланган булып калса, көненә бер-ике банан хәтта ябыгу программасына да уңышлы туры килә ала.
Моннан тыш, бананның табигый тәме кондитер эшләнмәләренә һәм башка десертларга булган теләкне киметергә ярдәм итә. Кайбер кешеләр өчен бу бик тә файдалы булырга мөмкин.

Бананны кайчан ашау яхшырак?
Моңа карата катгый кагыйдәләр юк. Аны:
• иртәнге аш вакытында аксым чыганагы булган ризык белән бергә;
• күнегүгә кадәр бер-ике сәгать алдан;
• физик активлыктан соң;
• төп ашлар арасындагы җиңел ризык буларак ашарга була.
Күпләр кич белән банан ашарга курка. Әгәр гомуми рацион балансланган булса, кичке аш вакытында бер банан ашау артык авырлык җыюга китерми.

Бананны нәрсә белән бергә ашау яхшырак?
Җиңел ризык туклыклырак булсын һәм озаграк туклык хисен сакласын өчен, бананны аксымнар яки файдалы майлар булган продуктлар белән берләштерү яхшы.
Мәсәлән:
• эремчек белән;
• табигый йогурт белән;
• чикләвекләр белән;
• шикәр кушылмаган арахис пастасы белән;
• солы боткасы белән.

Банан ашаганда кемнәргә саграк булырга кирәк?
Банан һәркемгә дә бердәй туры килми.
Иң элек организмның шәхси үзенчәлекләренә игътибар итәргә кирәк. Кайбер кешеләр банан ашаганнан соң ашказанында авырлык, эч күбү яки башка уңайсызлыклар сизәргә мөмкин. Мондый очракта үз халәтегезгә колак салу һәм туклану үзенчәлекләре турында белгеч белән киңәшләшү дөрес булыр.
Һәр ризыктагы кебек үк, монда да чаманы белү мөһим. Иң төп кагыйдә үзгәрешсез кала: кешенең сәламәтлеген аерым бер продукт түгел, ә, гомумән, туклану рәвеше билгели.