Алоэны куллануның гадәти булмаган 7 ысулы

 Алоэның мөмкинлекләре шактый зур, иң мөһиме – аны дөрес файдалана белү.
1. Алоэ – табигый сабын
Кыйммәтле косметик чаралар сатып алу һәрвакыт кирәк  тә түгел, чөнки кибет сабыны кул тиресен еш кына киптерә, бигрәк тә кулларны көн дәвамында күп тапкыр юганда. 
Аның тәэсирен йомшарту өчен алоэ һәм базилик ярдәм итә ала.
Яңа өзелгән алоэ яфракларын һәм базилик яфракларын блендерда ваклагыз. Сабын нигезен «водяная баня»да эретеп, әзерләнгән катнашма белән кушыгыз. Формаларга салып суытыгыз. Нәтиҗәдә тирене йомшак итеп чистарта торган табигый сабын килеп чыга.

2. Алоэ – целлюлитка каршы ярдәмче
Алоэ целлюлит белән көрәштә дә кулланыла.
Моның өчен алоэ гелен (йә булмаса яңа алоэ согын) һәм табигый кокос маен тигез күләмдә кушыгыз. Катнашманы суыткычта саклагыз, кулланыр алдыннан бераз җылытыгыз. Кайнар душтан соң аны целлюлит булган урыннарга сөртеп, җиңелчә массаж ясап уыгыз.

3. Алоэ – чәчләр өчен табигый тәрбия
Алоэ согы чәчләргә дә файда китерергә мөмкин.
Үсемлектән бер яфрак алып, аны урталай ярыгыз һәм эчендәге согын тарак тешләренә сөртегез. Шуннан соң ул тарак белән чәчегезне тарагыз. Алоэ согы чәчкә сеңә, аны йомшаграк, ефәксыман  итә, тарарга да җиңел була. 

4. Алоэ – эч авыртуын туктата ала 
Халык медицинасында алоэны эч авыртуларын басу өчен дә кулланалар.
Яңа алоэ яфрагының тышкы каты кабыгын алып, эчендәге йомшак өлешен аз күләмдә кабып куялар. Әмма мондый ысул һәркем өчен дә туры килми. Ашказаны-эчәк авырулары булган кешеләргә яки даими эч авыртуы күзәтелгәндә табибка мөрәҗәгать итү мөһим.

5. Алоэ – коры тирене дымландыра
Алоэ – тирене дымландыручы иң яхшы табигый чараларның берсе.
Ул тирене дым белән туендыра, тынычландыра, кызаруларны киметергә ярдәм итә. Моның өчен алоэ яфрагын урталай кисеп, шуның эчке ягы белән чистартылган бит тиресен сөртергә мөмкин.

Алоэ яфрагын, роза таҗларын һәм табигый йогуртны блендерда болгатып, маска ясарга һәм 10–15 минутка биткә сөртергә мөмкин.

Файдалы киңәш: көчле җилдә яки кояшта озак йөргәннән соң да алоэ согын кулланырга мөмкин: ул тирене тынычландыра, салкынча эффект бирә һәм тиренең саклагыч катламын торгызырга ярдәм итә.

6. Алоэ – артык тирләүгә каршы
Алоэдан табигый дезодорантны өй шартларында да әзерләргә мөмкин.
Моның өчен:
•    15 мл зәйтүн мае; 
•    15 мл глицерин; 
•    2 аш кашыгы алоэ геле; 
•    3 аш кашыгы аш содасы кирәк. 
Барысын да яхшылап болгатып, «водяная баня»да бераз җылытыгыз. Аннары капкачлы савытка салып суытыгыз. Барлыкка килгән гельне култык астына сөртергә мөмкин. Ул тирләүне һәм тир исен киметергә ярдәм итә.

7. Алоэ – ябыгу чорында ярдәмче эчемлек
Алоэны сәламәт яшәү рәвеше алып барганда да кулланалар.
Блендерда түбәндәге ингредиентларны болгатыгыз:
•    1 уртача кыяр; 
•    бераз имбир тамыры; 
•    кечкенә бәйләм петрушка; 
•    ярты лимон согы; 
•    ярты стакан алоэ согы. 
Эчемлекне кич белән эчәргә киңәш итәләр.

Игътибар: алоэ согын һәркемгә дә эчәргә ярамый. Йөклелек вакытында, кайбер ашказаны-эчәк авырулары булганда яки даими дарулар кабул иткәндә аны табиб киңәшеннән башка кулланмаска кирәк.
Алоэ – көнкүрештә дә, тире һәм чәчләрне карауда да киң кулланыла торган файдалы үсемлек. Әмма онытмагыз: алоэ косметик һәм ярдәмче чара буларак файдалы булса да, сәламәтлек белән җитди проблемалар булганда ул табиб билгеләгән дәвалануны алыштыра алмый.