Гүзәл Габбасова - "Яз гүзәле" бәйгесе җиңүчесе

Татарстан студентлары арасындагы иң милли бәйгеләрнең берсе булган, соңгы елларда вузара статусын алган “Яз гүзәле” матурлык һәм талант конкурсына кичә Казан Дәүләт Энергетика университетының Актлар залында йомгак ясалды. “Яз гүзәле” бәйгесе финалын һәм сәхнәгә чыккан ун татар кызының җиңүгә омтылышын “Татар-информ” хәбәрчеләре дә күзәтте.



“Миңа кызларның бөтенесе дә ошый, шуңа ел саен сорасалар да, мин жюрига кермим”, – диде бәйге финалы башланыр алдыннан Энергетика университеты ректоры Эдвард Абдуллаҗанов. Бәйге финалчыларын Россия Федерациясе Дәүләт Думасы депутаты  Илдар Гыйльметдинов та сәламләде. “Ниндидер аңлаешсыз урыннарда, аңлаешсыз кешеләр янәшәсендә аңлаешсыз гамәлләр кылганчы, үзегезне укуда, иҗтимагый тормышта, төрле мәдәни чараларда күрсәтегез, хәзергедәй матур тормышыгыз белән яшәгез, ә без сезгә булышырбыз”, – диде университетның якын дусты Илдар Ирекович.

Кызлар, чыннан да, бөтенесе матурлар, талантлылар – бииләр, җырлыйлар, нәфис сүз осталары. Бөтенесе чиста-матур итеп татарча сөйләшә.



Финал ярышларында кызларның алдан яздырылган “Визитка”лары тәкъдим ителде, аш-суга осталыкларын күрсәтеп, үзләре пешергән өлеш, чәкчәк, токмачлы аш, тары кыстыбые, өчпочмак, тутырган каз, бавырсак, кош тел, итле бәлеш һәм гөбәдияне сәхнәгә чыгардылар. Милли киемнән дефилега чыктылар һәм иҗади бәйгедә көч сынаштылар.

Боларның барысын да уңышлы үтеп, “Яз гүзәле” титулына Гүзәл Габбасова ия булды. Шулай итеп танылган дизайнер Ләйсән Хаҗиеваның бүләге – алдан вәгъдә ителгән энҗеле калфак Казан дәүләт энергетика университеты студентына насыйп булды. Кызга ректорның махсус бүләге – планшет та тапшырылды. Гүзәлне күпләр башкалардан аерылып торган академик вокалы аша да хәтердә калдыргандыр.



Быел, башка еллардан аермалы буларак, вице-мисс та билгеләнде. Әлеге титулга ике толымына чулпылар таккан Гөлназ Гатина ия булды.

Илдар Гыйльметдинов та чулпылы толымнарга битараф калмаган булып чыкты – депутатның махсус бүләге Гөлназга аталган иде. Гөлназ – Казан (Идел буе) федераль университетының беренче курс студенты, булачак финансист. Кечкенәдән үк сәхнәдә булган, төрле бәйгеләрдә җиңгән, “Сәләт”кә йөргән, татар теле олимпиадаларында катнашкан кыз. Тумышы белән Чирмешән районының Кармыш авылыннан.



Жюрига килгәндә, яшьләрне бәяләү нигездә яшьләргә тапшырылган, аның составында “Идел” яшьләр үзәге җитәкчесе Ләйсән Сафина, дизайнер Ләйсән Хаҗиева, Г.Камал театры артисты Ришат Әхмәдуллин, эстрада артисты Илгәрәй һәм башкалар бар иде.

“Энергоуниверситет ягына авышлык булырга мөмкин”, дигән иде Илдар Гыйльметдинов сәхнәдән бәйгедә катнашучыларны сәламләгәндә шаяртып. Ректор аңа җавап итеп: “Былтыр Казан дәүләт университеты җиңде, быел үзебез җиңсәк тә ярый”, – диде.

Чыннан да, “Яз гүзәле” титулына Энергоуниверситет студенты лаек булды. “Авышлыкмы”?


Бәйгене тамашачы буларак карарга һәм үз студиясендә эшләүче Айзилә Батырхановага көч биреп торырга килгән “Яшь ТНВ” җитәкчесе Рамилә Сәхабетдинова бәйгедә Гүзәлнең гадел җиңгәненә ышана: “Мин бик күп бәйгеләрнең жюри составында булганым бар. Әзерлекле кеше күренеп тора ул. Гүзәл, чыннан да, әзерлекле иде. Аның чиста, матур вокалы да жюрига уңай тәэсир иткәндер дип уйлыйм”, – диде.

Шактый сынаулар аша үтеп, “Яз гүзәле” бәйгесе финалына чыккан студент кызларның һәрберсенә дә – Айзилә Батырхановага, Әдилә Галимова, Ильгина Нигъмәтуллина, Сөмбелә Сибагатуллина, Наилә Сибгатуллина, Лиана Фазлиәхмәтова, Дарина Хәбибуллина һәм Луиза Шаһиевага “Ягымлы кыз”, “Сөйкемле кыз”, "Уңган кыз” кебек традицион титуллар бирелде.

“Яз гүзәле” титулына дәгъва итүче ун кызга бәйгенең интернет-битендә тавыш бирү дә оештырылган һәм барлыгы 11 меңнән артык тавыш бирелгән иде. Иң күп тавыш җыеп “Халык гүзәле” титулына Ильгина Нигъмәтуллина ия булды. Аның өчен 2,5 мең кеше тавыш биргән.

Киләсе елга “Яз гүзәле” проектының ун еллыгы булачак.

чыганак: http://tatar-inform.tatar

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • Балдаклар, туй күлмәге калды, ә мин... Сүземне ерактанрак башлыйм әле. Әти үлгәндә мин әле тумаган да булганмын – әни 7 айлык корсаклы килеш калган. Аңа бу вакытта нибары 21 яшь булган...
    8200
    2
    55
  • Бар җылымны сиңа бирәм, әни... Әнигә бар җылыңны да, назыңны да, яратуыңны да бирәсең, чөнки ул әни, һәм башкача уйлау, яшәү мөмкин түгелдер... Ә үз әниең булмаса?! Кемгә бүләк итәргә? Сине ничек бар шулай кабул итә торган кем бар тагын?! Әни бар! Иремнең әнисе!
    2488
    0
    40
  • Рәхмәт, әнием! Аның ирен үтереп ташладылар. Дөресрәге, үләр дәрәҗәгә җиткәнче кыйнап ыргыттылар... Аңсыз гәүдәсен өйләреннән ике йөз метрлар чамасы җирдә, барак кебек шыксыз йортларның пычрак ишегалдыннан таптылар...
    4793
    0
    38
  • Синнән башка беркем кирәкми Нурзидә белән Рәдиснең балалары юк. Күп еллар юк инде. Нурзидә моның белән күптән килеште. Рәдис тә килешкән кебек булган иде... 
    3906
    1
    33
  • Айгөл + Линар Бу язма – Татарстанның атказанган артисты Айгөл Бариеваның көндәлекләре. Аларда – ире Линар белән танышу тарихы, әнисен югалту ачысы, татар кызының ерак себердә дә үз юлына тугрылык саклавы, туган якка бөтенләйгә кайту шатлыгы. Ихлас, самими хатирәләр...
    4364
    2
    29
Реклама
Соңгы комментарийлар
Реклама
«Татар мамык шәле» бренды нәрсә ул?
«Татар гаиләсе / үрнәк алыгыз»
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда