​Булачак эретеп-ябыштыручылар имтихан тота

Соңгы биш елда республикада «Яшь һөнәрчеләр» WorldSkills хәрәкәте популярлашты. Татарстандагы хәрәкәт Россия һәм халыкара дәрәҗәсендәге 90 нан артык компетенцияне үз эченә алды. Мондый массалы күренеш илнең берничә төбәгендә генә. Иң популяр компетенцияләрнең берсе – «Эретеп ябыштыру». Казанда үтәчәк Бөтенроссия чемпионатында әлеге һөнәр буенча көч сынашырга барлык регионнардан да киләчәкләр.  

Эретеп-ябыштыручы һөнәре белем бирү учреждениеләрендә абитуриентлар арасында киң таралган. Ул шулай ук хезмәт базарында ихтыяҗ зур булган ТОП-50 һөнәрләр исемлегенә керә.  

Көллиятне тәмамлаган студентларның әзерлек сыйфатын ачыклау өчен  республикада инде икенче ел WorldSkills стандартлары буенча Федераль демонстрацион имтиханнар үткәрелә. Узган ел Татарстанның 7 көллиятеннән 100 кеше катнашты. Имтихан Казан политехник көллиятендә узды. Быел аны 166 кеше тапшыра.




Компетенция өчен махсус биш үзәк оештырылды. Имтиханнар апрельдә башланып, июньдә тәмамланачак. Быел Мамадыш политехник көллиятендә дә беренче тапкыр демонстрацион имтиханнар уза. «Эретеп ябыштыру» компетенциясе буенча төбәк чемпионатында максималь бал – 28,9. Хәзерге вакытка имтихан бирүчеләрнең 30% ы гына югары балны җыя алды. Казан политехник көллиятенең WorldSkills буенча директор урынбасары, баш эксперт Елена Закирова әйтүенчә, биремнәрнең авырлыгын исәпкә алсаң, нәтиҗә начар түгел. 



Имтиханда экспертлар сыйфатында һөнәри белем бирү учреждениеләре укытучылары, эш бирүчеләрнең вәкилләре – эретеп–ябыштыру өлкәсеннән барлыгы 24 белгеч. Әлеге һөнәр ир-атларныкы дип исәпләнә. Тик экспертлар арасында 5 хатын-кыз да бар. 


Аларның берсе –Елена Закирова инде ике ел буе «Эретеп-ябыштыру технологияләре» компетенциясенең махсус үзәк җитәкчесе урынбасары сыйфатында фикердәшләре төркеме белән бергә төбәктә эретеп-ябыштыруны үстерү, бу өлкәдә белем бирүне камилләштерү белән шөгыльләнә. WorldSkills тарихында беренче тапкыр Казанда үтәчәк Бөтендөнья халыкара чемпионатында ир-ат компетенциясе үткән мәйданда техник администраторның хатын-кыз ярдәмчесе дә әле ул.