Татарстанның халык артисты Венера Шакирова Яңа елга каз пешерү рецепты белән уртаклашты. Ул казны бу рәвешле инде беренче генә елын пешерми икән, сыналган рецепт, диюебез.
Бәйрәмгә ике көн кала казның эчен-тышын бик яхшылап тоз белән ышкыйбыз да, табакка салып, балконга яки өй алдына чыгарып куябыз (салкын урын кирәк). Табакны тастымал белән каплыйбыз. 2 көн вакытыгыз булмаса, минимум 1 көн булса да тотарга кирәк. 2 көннән казны алып кереп, эченә-тышына бал ягабыз.
Казның эченә тутыру өчен тулыр-тулмас 1 стакан карабодай ярмасын юып, яртылаш пешерәбез дә 1 уч кара җимеш, төше алынып, дүрт-биш кисәккә бүленгән 2 ачы алма белән аралаштырып, каз эченә тутырабыз. Эчен энә-җеп белән тегеп, полиэтилен җиңгә (рукавка) тыгылган казны кичке сәгать 11ләрдә 80 градустагы мичкә урнаштырабыз. Иртәнге 7гә кадәр шунда бик шәпләп кенә пешә ул. Аннары температураны 140 градуска көйләп, тагын бер сәгать тотабыз.
«Бу ысул электрга көйләнгән мич өчен отышлы. Газ мичендә пешереп караганым юк, шуңа күрә әйтә алмый», – дип кисәтте Венера Шакирова.
Следите за самым важным и интересным в Telegram-каналеТатмедиа
Комментарий юк