Сарма төрү дигәнне аңлата. Сарманың тәмен аңлатып биреп булмый, аны ашап карарга кирәк – шәрык ашларына хас булганча әчкелтем-төчкелтем бу ризык Төркиядә бик популяр икән. Далмадан аермалы буларак, сарма гадәттә бик юка була. Аны лимон һәм зәйтүн мае белән салкын килеш тә, ә каймак белән кайнар килеш тә биреп була. Булгур ярмасы ит белән катнашканда бер-берсенә бик тә туры килә. Сыйланып карагыз әле!
Кирәк:
* 15-20 кәбестә яфрагы;
* 100 г булгур ярмасы;
* сыер итеннән 200 г фарш;
* 1 баш суган;
* 1 аш кашыгы паприка;
* 1 аш кашыгы кибет каймагы;
* тәменчә тоз, борыч;
* 250 мл су яки шулпа.
Эш барышы:
1. Булгур ярмасына кайнар су коеп, ярты сәгатькә бүрттерергә куябыз.
2. Кәбестәнең өске өлешеннән кисеп, яфракларын таратабыз.
3. Яфракларны 3-4 минут тозлы суда кайнатып алабыз. Аннан салкын су астында суытабыз. Һәр яфракның уртадагы калын өлешен кисеп алабыз.
4. Табакка фарш, булгур ярмасы, вак итеп туралган суганны бергә кушабыз. Тоз, паприка аштәмләткече, төелгән кара борыч, каймак кушып, барысын да бик әйбәтләп болгатабыз.
5. Кәбестә яфрагын урталай кисеп, уртасына 1 чәй кашыгы эчлек салып, конверт кебек төрәбез.
6. Сарманы киң кырлы кәстрүлгә тезеп, өстенә шулпа агызабыз.
7. Өстен, пресслап, җәенке тәлинкә белән томалыйбыз. 40 минутлап пешерәбез.
8. Әзер сарманы лимон белән бизәп, каймак белән табынга чыгарабыз.
Марина Дмитриева,
Комментарий юк