Дискотека

Яшь чакта сез дә авыл клубына дискотекага йөрдегезме ул? Дискотека дип... без аны клубка чыгу дип йөртә идек. «Бүген клубка чыгабызмы?» Кич көтү каршыларга баргач, кызлар белән шулай сүз берләшәбез: түтәлләргә су сибеп, кош-кортны ябып бетергәч, кичке ашны ашап, савыт-сабаны юып урнаштырганнан соң, клубка чыгабыз! 

Инстаграмда җырчы Ландыш Нигъмәтҗанованың кызы Ләйләнең дискотекага җыенуын күргәч, яшь чаклар, җәйге каникулда дискотекага йөрүләр искә төште. Әй, шул чаклар искә төшсә, әле дә йөрәкләр җилкенеп куя!

Безнең яшьлек узган гасырның 90 нчы елларына туры килде. «Мальвина» чалбарлар, «Бойнц» свитерлар модада булган чорга. Хәтерлисезме ул киемнәрне? Аның әле «турецкий» итәк белән алгы ягы кызыл ромбиклап бәйләнгән кара  төстәге «турецкий» свитер дигәне дә бар иде. Соңгысын кара бәрән җебен эрләп, ак бәрән йонын кызылга манып, миңа әни үзе бәйләп биргән иде. «Модный» киемнәре булганнар – дискотеканың йөзек кашы инде. Берәрсе «мальвина» чалбар киеп чыкса, барыбызның да көнләшүдән күзе яна. Берара күкрәгенә һәм җиңенә өч төстәге тасма тегелгән спорт костюмнары да бик модада булып алды. Минем дә бар иде ул ялтыравык тукымадан тегелгән шароварлы спорт киеме. Гаҗәп матур булып тоела иде үземә. Шушы киемнән төшкән фотоны күргәч, кызым кычкырып көлде: «Ну, әни, ну и вкус булган синең». Сыйфаты әллә кем булмаса да, шулкадәр кыйммәт иде әле алар һәм сатып алырга юк иде әле ул.  ...Чәчләр начес белән тарап күпертелгән, алгы маңгай чәче кашык сабын газда көйдереп шәпләп бөдрәләтелгән, яхшылап лак белән катырылган... «Цветы России» хушбуеның бик популяр чаклары: клубта шомырт исләре, энҗе чәчәк, миләүшә исе...

Клуб дигәч тә, аның әле ул вакытта клубы да иске генә бер агач бина. Безнең авыл клубы элеккеге мәдрәсә бинасында урнашкан иде. Үзе бер якка таба янтайган. Шулай булса да, дискотекалар бик хәтәр күңелле уза иде безнең. Үзебезнең дә ишебез бар, өстәвенә, күрше авыллардан да егетләр килә. Клуб ишек алды мотоцикл паркы булыр иде. «Минск»лар, «Иж»лар, «Восход»лар... Хәтерлисезме сез аларны? Йә, кайсыгыз җәйге басу юлында матайда җилдергән иде? Биткә җылы һава агымы бәрелә, озын чәчләр җилдә тузгый! И-их! Матае булган егет – чын егет иде инде. Кызлар ул вакытта да матайлы егетләргә кызыга иде.

...Ә клубта дискотека кыза гына. Кемдер ике кассеталы магнитофонын (нинди байлык!) сәхнә читенә куйган да, теттерә генә Алена Апина «Ксюша» җырын: «Ксюша, Ксюша, юбочка из плюша...» Ул җырлап туктауга, «Технология» төркеменең «Нажми на кнопку»сы башлана: «Нажми на кнопку, получишь результат...»  Наташа Королева белән Игорь Николаев «такси» дип өзгәләнә. Иванушкиларның «Тополиный пух»ына сикергәлибез: «Тополиный пух, жара, июль...» Татьяна Буланова җырлаганда егетләр салмак биюгә чакыра. Әле без кыстатабыз, тиз генә чыкмыйбыз. Әй, шушы җырларны ишетсәм, әле дә яшьлектәгедәй бер сикереп аласы килә. «Эй, Макарена»ны кайсыгыз хәтерли?! 
Әнә шулай кызып кына биеп ятканда, клуб ишеге ачыла да... 

...Безнең әни сеңлем белән минем клубка чыкканны яратмый иде. «Ничәдә кайтасыз? Унбердән калсагыз, чәчегездән сөйрәп алып кайтам!» Безнең арттан көн дә шулай кычкырып кала. Соң, әни, кичке унда клубка чыгабыз гына бит әле. Бер сәгать кенә пүчтәк бит инде ул. Без аның узып киткәнен сизмибез дә хәтта. Күп көнне әни бу вакытта арып йоклый инде (авыл кешесе иртә торгач, иртәрәк яту ягын карый бит ул). Безнең ничәдә кайтканны белми кала. Аны уятмас өчен, без эчтән эленгән ишек келәсен озын пычак белән сак кына күтәреп ачабыз да, аяк очына гына басып, тизрәк кереп ятабыз. Идән сайгагының кайсысы шыгырдаганын да күзне бәйләсәләр дә беләбез, анысына басмыйбыз. Өйдә кыштырдамас өчен, ишек алдында ук чишенеп, киемнәрне култык астына кыстырабыз. Алай-болай каршыга әни чыкса, аларны бер читкә томырасың да, йокысыннан уянып та бетмәгән кеше кыяфәте чыгарасың. Имеш, син инде әллә кайчан кайтып яткан, әле менә йомыш белән генә чыгып кергәнсең... 
Әмма кайчак әни төн уртасында уянып китә дә, безне барлый. Юрганны күпертеп, астына бөкләнгән покрывал салып калдыру, мендәргә берәр төрле кара төстәге нәрсә куеп калдыру да кайчак ярдәм итми, әни хәйләне сизеп ала. Сизеп ала да, клубка безне юллап китә. 

...Менә берзаман клубның ишеге киерелеп ачыла да, «Руки вверх»ның «Эй, девчонки»сын күмеп, әнинең дәһшәтле тавышы яңгырый. Урыны оҗмах түрендә булсын, безгә әни дә, әти дә булган әниебез зур гәүдәле, кырыс холыклы усал хатын иде. Сүзен тыңламасаң, биргәләп тә алырга мөмкин. Әни клубка алгы ишектән килеп керүгә, сеңлем белән без икебез сәхнә артындагы  арткы ишектән чыгып сызабыз. Ничек тә әнидән алдарак кайтып җитеп, тизрәк юрган астына чумарга кирәк. Ачулануын, ул барыбер ачуланачак инде. Ләкин клубта кеше алдында кирәгеңне бирсә, хурлыгы ни тора бит аның! 

Ул вакытта әнинең безне эзләп клубка килүе бик гарьләндерә иде мине. «Башкаларның әниләре берсе дә болай йөрми, син ник безне хурлыйсың?» – дип елый идем. «Үзеңнең кызың булып, төнгә кадәр йөри башласа, белерсең әле», – ди иде әни. Хәзер инде үз кызым да дискотекаларга йөрерлек яшьтә. Бәхетемә диимме, кызганычкамы – авылыбызда элеккеге шикелле дискотекалар үтми инде. Аның клубка чыгардай яшьләре дә юк. Шулай да, үзебезнең янтайган агач клублы, матайлы, магнитофонлы, «мальвина»лы, дискотекалы, «Руки вверх»лы яшьлегемне сагынам мин. Җиләк чоры бер генә булган кебек, дискотекаларда сикерә торган вакыт та бер генә бит ул. Килешәсезме?

фото: https://pixabay.com/ru/

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (4)
Cимвол калды:
  • 22 апрель 2021 - 07:49
    Без имени
    Яшьлеккә кайтып килдем, рәхмат, нәкъ шулай иде. "Мальвина" га кадәр "банан" чалбарлар булды, безгә тәтемәде,Уфадан кунакка кайткан кыз кия иде,ярты авыл егете шуны озата төшә. ☺️☺️☺️. Кулга тотып йөри торган магнитофонлы 1-2 егет бар иде авылда, алар блатной!
  • 25 декабрь 2020 - 16:20
    Без имени
    80-90 нчы еллар ин шэп еллардагы дискэтуклэр инде алар.сагынып искэ алырга гына калды шул инде.
  • 19 август 2020 - 16:48
    Без имени
    Шәп заманнар иде ул
  • 7 август 2020 - 13:56
    Без имени
    Лилия, нэкь шулай иде бездэ дэ. Ул "Мальвина" чалбары бездэ (чистайда) 1500 э Казанда кысык кузлэр базарында 900 сумга алып була иде. Мин иптэш кызыма ияреп шуннан барып алган идем. Иии кая калган ул вакытлар. Инде 50 гэ житэбез э кунел гел яшь.
Хәзер укыйлар
  • 7346
    1
    65
  • 7139
    0
    58
  • Балан ачылары Әйдәгез, без бу хатынның исемен күрсәтмибез. Шулай исемсез генә булсын ул. Аның ни атлы булуы мөһим дә түгел бит. Ул – шушы көндәлекләрнең хуҗасы.  Теләсәгез, бастырыгыз, гыйбрәт булсын дип, егерме ел элек язылган дәфтәрләрне, миңа биргән иде.
    7166
    1
    50
  • «Насыйбың булыр әле!» Әдибә эштән кайтып керде дә, бермәлгә ишек төбендә тукталып, йорт эченә күз салды. Их, күңелгә рәхәт тә соң нур бөркеп торган өеңә кайтып керүләре! Бар җирдә дә тәртип,
    5010
    2
    50
Реклама
Соңгы комментарийлар
  • 30 апрель 2021 - 20:44
    Без имени
    Егет кешене күп кызлар ярата , концертына агылачак .Озак " мин егет " - диеп йөрер әле Ришат .
    Ришат ТӨХВӘТУЛЛИН: «Чак кына соңрак туганмын» 
  • 1 май 2021 - 21:53
    Без имени
    Ин яраткан жырчым.Телевизорда Ришатнын жырларын тапшырсалар, бар эшемне ташлап залга йогереп чыгам.Балалар да кунектелэр,тиз бул,дип,чакыралар.
    Ришат ТӨХВӘТУЛЛИН: «Чак кына соңрак туганмын» 
  • 2 май 2021 - 10:03
    Без имени
    Әйтер сүз юк...Гыйбрәтле хикәя! Без, татар хатын - кызлары, үз теләгебезне гел соңгы чиратка куеп өйрәнгән...тик, иң мөһименә кемнәндер рөхсәт сорамыйча үзебез дөрес дип санаганча карар кабул итәргә өйрәнсәк иде. Бу менә шушы очрак... Күңеле теләгәндә кайта алмавы гомере буена исеннән китмәячәк!!! Безнеке үтте...кире кайтарып булмый. Яшьләр, сезгә сүзем: ирне дә кимсетми үз теләгегездә нык торып, күңелегез кушканны үз акылыгызга, хисегезгә таянып гамәлгә салырга өйрәнегез!!! Без теләгегебезне аңлап үтәү түгел үтәргә теләмәгән дә ир кешене акларга тиеш түгелбез! Бу хикәяне укытып күптәннән әйтәсе килгән фикеремне Аллаһ фарыз итте күрәсең!!!
    SOS! Җанымны коткарыгыз!
  • 2 май 2021 - 15:11
    Без имени
    Бик яраткан артискам. "Сүнгән йолдызлар" дагы Сәрвәре генә дә аның буй җитмәс талантка ия икәненә дәлил.
    Җаным монда кала...
  • 2 май 2021 - 23:15
    Без имени
    Гажэеп дэрэжэдэ талантлы актриса турындагы язма очен рэхмэт. Олкэнэя барган саен, матурлыгы арткан кешелэр була. Аларнын эчке матурлыгы тышкы гузэллеккэ кушыла. Флера Хэмитова шундйлардан. Сабырлыгы,горурлыгы,гузэллеге белэн сокландыра ул. Хаман да сокландыра...
    Җаным монда кала...
Реклама
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан
«Объективта – әни»