Акча аласыңмы яки соцпакетмы икәнен хәл итү өчен санаулы гына көн калып бара. 1 октябрьдән соң инде кабул иткән карарыңны бер ел буена үзгәртә алмаячаксың. Торган саен күбрәк кешенең акчаны сайлавы табибларны борчылырга мәҗбүр итә. Әлеге соцпакет болай да сәламәтлеге какшау кешеләргә, ягъни инвалидларга бирелә. Аларның күпчелеге, алга таба сәламәтлегенең тагын да начарланып, кыйммәтле дарулар алырга туры килерен уйламый, ай саен пенсия акчасына өстәлүче 716 сум акчага кызыга. Ә соцпакеттан бер баш тарттыңмы, киләсе елга кадәр карарыңнан баш тарта алмыйсың. Ә бит болай да сәламәтлеге какшау кешегә теләсә кайсы вакытта кыйммәтле дарулар алырга кирәк булырга мөмкин. Мисал өчен, республикабызда 90 мең кеше онкологик авырулар белән исәптә тора – һәр 43нче татарстанлыда яман шеш табыла. Шикәр авыруы белән чирләүчеләр 110 меңнән артык.
Дөрес, акчаны сайлаучыларны да аңларга була. Кирәкле даруларны бушлай гына алыйм дисәң, ай саен табибка барып, рецепт яздырырга кирәк. Ә анда никадәр чират икәне берәүгә дә яңалык түгел. Авыл җирләрендә яшәүчеләр өчен район үзәгенә бару үзе бер мәшәкать. Кирәкле даруның даруханәдә булмавы да бар. Менә шушы кыенлыклар күп кешене акчаны гына сайларга этәрә дә инде. Кирәкле даруны шул акчага үзем генә сатып алырмын дип уйлый алар. Әмма... җитди генә авырып киткән очракта, 716 сумның дәвалану өчен җитмәсе көн кебек ачык.
Бу урында халыкның мәгълүм мәкале үтә дә урынлы яңгырый: җиде кат үлчә, бер кат кис.
фото: http://pixabay.com
Следите за самым важным и интересным в Telegram-каналеТатмедиа
Комментарий юк