Люция Фарсина (30.09.1930–4.03.2005) – Татарстанның атказанган артисты.
Казанда туа. 1951 елда Казан театр училищесын тәмамлый. Шул елны ук Республика күчмә театры труппасына (хәзерге К. Тинчурин исемендәге драма һәм комедия театры) эшкә алына. 1958–1961 елларда Камал театрында эшләп ала. Төрле еллар аралыгында шулай ике театрда эшли. 1971 елдан кабат күчмә театрга кайта. Әйдәп баручы артистларның берсенә әверелә. Шук малайлардан башлап (Сәгыйть – «Кара йөзләр» М. Гафури), саф күңелле татар карчыгына кадәр (Зөлхия – «Кыр казлары артыннан» И. Юзеев) җиренә җиткереп, ышандырып уйный. Музыкаль драмаларда поэтик геройларны бик табигый итеп башкара. Чит телдән тәрҗемә ителгән пьесаларда уйнаган рольләре дә ихлас. Мәсәлән, А. Островскийның «Гаепсездән гаеплеләр» пьесасындагы Кручинина ханым ролендә ул, әйтерсең лә, үз-үзен, үз тормышын уйный. Шундый ук көйләнмәгән тормыш, сәхнәгә булган шундый ук мәхәббәт, шундый ук бәхетсезлек. 1980 елда Люция ханым ТАССРның халык артисты исеменә лаек була.
Комментарий юк