Зәйнәб туган көненә – бәйрәмгә чакыра!

Билгеле булганча, Татарстанның халык артисты Зәйнәб Фәрхетдинованың иртәгә туган көне – юбилие. Туган көне таңын ул балачагы калган авылы – Сарлысында каршылаячак. Азнакай районының иң гүзәл нокталары саналучы бу сала Ык буена урнашкан. Зәйнәбләрнең бакча артында гына икән бу елга. Иртәгә Ык янындагы үзәнлектә җырчыбыз якташларына зур концерт-тамаша бүләк итмәкче. Әлеге чарага аның иҗатташ дуслары да чакырулы. Шулай ук бәйрәмгә Азнакай районыннан чыккан башка күренекле иҗат әһелләре дә кайтыр дип көтелә. Дөрес, чакыру билетлары өләшенмәгән – кемнең мөмкинлеге һәм теләге бар – бар да рәхим итә ала ямьле Ык буена. Ахырдан яшьләр өчен дискотека да каралган. Шәп булырга ошаган бу тамаша!

Юбилее алдыннан Зәйнәбнең китабы да дөнья күрде. Дөрес, җырчының үзеннән, гаиләсеннән башка әле аны беркем дә әле кулына тотып карамаган. Хәтта җыентыкның авторы, мөхәррире Гөлгенә Кәримова да. Беренче нөсхәләрне күрү бәхетенә ирешүчеләр дә Сарлы, Азнакай районы кешеләре булачак икән. Китапның авторы, Татарстанның атказанган мәдәният хезмәткәре Гөлгенә Кәримова әйтүенчә, китапка Татарстанның халык артистының тормыш һәм иҗат юлы турындагы уйланулары, истәлек-хатирәләре, аның турында массакүләм мәгълүмат чараларында дөнья күргән кайбер язмалар, төрле чорларны чагылдыручы фоторәсемнәр урын алган. Шулай ук җырчыдан афоризмнар, аның белән бәйле кызыклы вакыйгалар да тәкъдим ителә. «Зәйнәб белән бергә эшләү бик тә кызык һәм рәхәт булды. Аның шундый рәхәт, гади кеше икәнлеген белмәсәм, бу китапка тотынмаган да булыр идем. Безне җыр таныштырды, озын юл – бергәләп Венгриягә барып кайту дуслаштырды. Инде менә бергәләп китап та яздык. Истәлекләрдә бернинди күпертүләр, җырчыны фәрештә итеп күрсәтүгә омтылу юк. Барысы да ачыктан-ачык. Тормышта Зәйнәб нинди, китапта да нәкъ шундый», – ди автор.

Яраткан җырчыбызны без дә гомер бәйрәме белән котлыйбыз, сәламәтлек, бәхет, иҗат уңышлары телибез!