«WorldSkills ярышларына тотылган акчаны санамыйбыз...»

Бүген һөнәри осталык буенча WorldSkills Kazan 2019 дөнья чемпионаты ачылу тантанасы алдыннан «Казан Экспо» күргәзмәләр үзәгендә узган матбугат очрашуында Россия хөкүмәте башлыгы урынбасары, WorldSkills чемпионатын оештыру комитеты рәисе Татьяна Голикова әнә шулай дип белдерде. Билгеле, чемпионатны оештыруда федераль казнаның ярдәме зур. Эш бирүче компанияләр дә 2,7 млрд. сум күләмендә акчалата булышкан. Монна кала, ярыш уздыру мәйданнарын җиһазлау да – алар хисабыннан. «Чемпионатның Казанда узуы да безнең өчен уңышлы булды, Татарстан донор төбәк, өстәмә чыгымнарга мөмкинлеге бар», – дип билгеләп узды Татьяна Голикова, республика бюджеты ярдәменә ишарә итеп. 

Татарстан Президенты Рөстәм Миңнехановның WorldSkills ярышларына үз өметләре. Беренчедән, мондый халыкара чаралар уздыру шәһәр үсешенә уңай тәэсир итә; икенчедән, илне тәкъдим итү өчен лаеклы мөмкинлек. Шунысын да әйтергә кирәк, мондый мәртәбәле чемпионатны Россия беренче тапкыр кабул итә. «Килгән кунаклар канәгать булып китсен өчен барысын да эшләячәкбез. Моның өчен барыбыз да җаваплы», – дип белдерде Президент. Ярышка барлык инфраструктураларның әзер булуын әйтте. Рөстәм Миңнеханов ярыш уздыру өчен алынган җиһазларның Татарстанга калдыруларына өмет итүен белдерде.

WorldSkills хәрәкәте республика яшьләренә үз юлларын табарга да мөмкинчелек бирде. Татарстанда эшче һөнәрләр әзерләү өчен 37 ресурс үзәк булдырылган. 2024 елга алар санын 41 гә җиткерергә уйлыйлар. 

Татьяна Голикова белдерүенчә, илдә мәктәп укучыларының 60 проценты урта һөнәри белемне сайлый. Киләчәктә бу сан тагын да артачак, чөнки Россиядә «Мәгариф» илкүләм проект кысаларында «Яшь һөнәрчеләр» программасы эшли башлады.