Төркиянең дәүләт корпорациясе «Алабуга» махсус икътисади зонасына 300 млн доллардан артык акча керткән

Республика лидеры "Алабуга" махсус икътисади зонасында уңышлы эш алып баручы «Шишеджам» компанияләре төркеме предприятиесендә булды.

«Тракья Гласс Рус» АҖ 2010 елның сентябреннән МИЗ резиденты булып тора. Пыяла җитештерә торган Төркия-Франция заводы төзелешенә 200 миллионнан артык АКШ долллары сарыф ителгән. Линиянең яссы пыяла җитештерү егәрлеге елына 250 мең тонна тәшкил иткән, ә көзге - 4,5 млн кв метр. Компания елына 4,5 млн кв метр яңа төр пыяла җитештерә торган линия эшләтеп җибәрергә планлаштыра. «Автоматив Гласс Альянс Рус» АҖ - 2011 елның августыннан «Алабуга» МИЗ резиденты. Компанияләр төркеме завод төзелешенә 100 млн доллар сарыф иткән. Бу предприятие автомобиль пыяласы җитештерә. Проект егәрлеге Россия автомобиль сәнәгате ихтыяҗы өчен елына 6,4 млн берәмлек автопыяла җитештерергә яраклы.

"Ике предприятие дә җитештерү егәрлекләрен арттырырга әзер. Яңа инвестицияләр күләме 150 млн доллар булырга мөмкин", - диде «Шишеджам» дәүләт корпорациясе генераль директоры Әхмәт Кырман. "Әмма әлегә Төркия белән Россия арасында мөнәсәбәтләр хәл ителеп бетмәгән, шуңа күрә көтәргә туры килә", - диде ул.

"Компанияләр төркеме Россиянең 15 төбәгендә эшли. «Шишеджам» ил икътисадына 1 млрд 100 млн доллардан артык инвестиция керткән. Дәүләтләр арасында аңлашылмаучылыклар чорында безнең предприятиеләр зур ярдәм тойды, бигрәк тә Татарстанда", - диде Әхмәт Кырман.

"Безнең дәүләтләрне күптәнге ныклы мөнәсәбәтләр бәйли, ә аңлашылмаучылык - ике як өчен дә югалту", - диде ул.

http://tat.tatar-inform.ru/