23-15 апрель көннәрендә Истанбулда IV Бөтендөнья төрек форумы үткәрелә. Төрек Азия стратегик тикшеренүләр үзәге тарафыннан оештырылган чарада «Иҗтимагый дипломатия, медиа, мәгълүмат», «Дәүләт структурасындагы үзгәрешләр, иминлек», «Төрки дөнья һәм диаспора өчен яңа перспективалар», «Җирле идарә» кебек темалар яктыртылачак. Шулай ук Чанаккале сугышына 100 ел тулу белән бәйле чыгышлар да булыр дип көтелә. Әрмәнстан проблемалары да телгә китереләчәк.
Форумны ачу тантанасында кунакларны Төркия Премьер-министры Бүләнт Арынч сәламләп чыгыш ясар дип көтелә. Форумда төрки дөньяның югары уку йортлары галимнәре, иҗтимагый оешмалар, дәүләт матбугат корылышлары вәкилләре, танылган дипломатлар, язучылар, хокукчылар катнаша.
Чара кысаларында төрки дөньяны ныгытуга өлеш керткән шәхесләрне “Кызыл алма” премиясе белән бүләкләү тантанасы оештырылачак.
IV Бөтендөнья төрек форумына Татарстаннан «Яңа гасыр» тележурналисты Раил Өметбаев һәм «Татар-информ» мәгълүмат агентлыгының Төркиядәге хәбәрчесе Рушания Алтай чакырулы.
Сылтама:
http://tat.tatar-inform.ru/news/2015/04/20/108593/
Комментарий юк