ТР Инвестицион үсеш агентлыгы җитәкчесе: "Россия-япония икътисади хезмәттәшлегенең мөмкинлекләре бик зур"

Татарстан Республикасы Президенты вазифаларын вакытлыча башкаручы Рөстәм Миңнехановның Азия илләре белән эшне активлаштыру йөкләмәсен үтәү кысаларында, ТР Инвестицион үсеш агентлыгы җитәкчесе Талия Миңнуллина "Россия - япония: эшлекле хезмәттәшлек перспективалары" түгәрәк өстәлендә катнаша.

Искәртеп узабыз: Петербург форумында ТР Президенты вазифаларын вакытлыча башкаручы Рөстәм Миңнеханов җитәкчелегендәге Татарстан делегация катнаша.

Чараны оештыручылар билгеләп узганча, соңгы елларда Азия илләре тотрыклы тышкы икътисади элемтә булдыруда Россиянең төп партнерлары санала. Ә Япония иң төп уенчыларның берсе булып тора һәм Россия компанияләре арасында зур кызыксыну уята. Әмма шул ук вакытта икътисади һәм инвестицияле хезмәттәшлекнең яңа дәрәҗәсе турындагы мәсьәлә актуаль булып кала бирә.

Россия икътисади үсеш министры урынбасары Станислав Воскресенский билгеләп узганча, Россия һәм Япония хезмәттәшлегенең аеруча перспективалы юнәлешләре булып авыл хуҗалыгы, логистика һәм транспорт, мәгълүмати технологияләр санала.

Түгәрәк өстәлдә Япония ягы вәкилләре: Япониянең Россия һәм яңа бәйсез дәүләтләр белән сәүдә итү буенча ассоциациясе вице-президенты Масахиро Иби, Fast Retailing Co Ltd төркеме башкаручы вице-президенты Норнаки Кояма, Japanese Business Club рәисе Хироси Мэгуро актив катнашты.

Япония эшлекле даирәләре вәкилләре билгеләп узганча, "Россиянең безнең ил белән кызыксынуы арту күзәтелә һәм без мөнәсәбәтләрне үстерүне хуплыйбыз". Бигрәк тә сәнәгый җитештерү, визасыз режим кертү һәм хезмәт базарына керү кагыйдәләрен йомшарту мәсьәләләре актуаль булып кала. Әлеге мәсьәләләрне хәл итү икътисади мөнәсәбәтләрне яңа дәрәҗәгә чыгаруга булышачак, дип билгеләп үтте Япония делегациясе вәкилләре.

Хәзерге вакытта уртак зур проектлар тормышка ашырыла, дип белдерде "РусГидро" АҖ идарә рәисе Евгений Дод. Аерым алганда, бу Приморьеда газ-турбина җайланмалары, станцияләр, шулай ук 15 җылылык генерациясе объектын төзү, шул ук вакытта Хабаравск һәм Камчатканың иң ерак участокларында альтернатив энергия чыганаклары аерым кызыксыну уята.

"Россия - Япония икътисади хезмәттәшлегенең потенциалы бик зур. Әлеге потенциалны ачуда зур рольне Россия Федерациясе субъектлары уйнарга тиеш. Лидер төбәкләрнең берсе булган Татарстан өчен югары технологияле бизнес белән нәтиҗәле хезмәттәшлек зур кызыксыну уята. ТР Инвестицион үсеш агентлыгы, инвестицияләр өлкәсендә махсуслашкан орган буларак, Япония эшлекле даирәләре белән эшен көчәйтәчәк", - дип ассызыклады  чарада катнашкан агентлык җитәкчесе Талия Миңнуллина.

Искәртеп узабыз: Япония делегациясе Татарстанда май аенда булып китте, сәфәр ТР Инвестицияле үсеш агентлыгы тарафыннан оештырылган иде.

Сылтама: http://tat.tatar-inform.ru/news/2015/06/18/110533/