Кайгылы көннәребез... Күңелләр болай да үзенә урын табалмый бәргәләнгән моңсу елак көздә авыр хәбәр алдык. Дмитрий Хворостовский арабыздан китте...
Иртәме-соңмы шушы тетрәндергеч хәбәрне ишетәсебезне алдан ук белеп торсак та, нәрсәгәдер өметләнгән идек, җырларын, концертларын, журналистларга биргән интервьюларын яхшыга юраган идек...
Ул бөек җырчы иде. Россиянең генә түгел, дөнья операсы йолдызы иде... Буй-сыны, төс-бите белән дә, эчке күңел дөньясы белән дә искиткеч матур кеше иде... Аның тавышы мәңге яңгырар безнең өчен... Аның турындагы хатирәләрне кайта-кайта күңелдә яңартырбыз... Сагынырбыз...
22 июньдә җырчы Австриядә Графенег замогының ачык сәхнәсеннән җырлады. Аида Гарифуллина аның партнеры иде. Хәзер ул Дмитрий турында күз яшьләрсез генә сөйли дә алмый. «Ул һәркемгә хөрмәт белән яратып карый иде. Киңәшләр бирде, булдыра алганча ярдәм итәргә тырышты. Графенегтагы чыгышыбыз вакытында ул миңа гына ишетелерлек итеп: «Мин сиңа уңышлар телим. Синең бар да яхшы булачак... Бу минем соңгы концертым», – диде.
Тамашачының көчле алкышлары вакытында, рәхмәтебезне белдереп баш игәндә әйтелде ул сүзләр. Елап җибәрдем. Аңлашыла инде: бу – Диманың минем белән генә түгел, сәхнә белән, тамашачылар белән хушлашуы иде. Алай дип әйтмәвен үтендем, алда әле күп концертлар, күп бәхетле еллар, тамашачылар аны бик ярата, янәсе... «Подмосковные вечера»ны биска башкардык. Соңгы чыгышыбыз иде. Зал аягүрә алкышлады».
Фото: Facebook © Dmitri Hvorostovsky
Комментарий юк