Татарстанда театрга мәхәббәтне яшь вакыттан үк тәрбияләргә җыеналар. Яшүсмерләр үзләре драматург булып, ягъни пьеса язып караячак. Әлегә остазлар ярдәмендә, әлбәттә.
«Классная драма» театраль лабораториясе проекты Казанда 16-29 август көннәрендә үтәчәк. Хәзерге замана драматурглары, Class Act яшүсмерләр белән эшләү буенча Британия методикасы белгечләре Юрий Клавдиев һәм Кира Малинина һәм яшь татар драматургы, шагыйрь Рүзәл Мөхәммәтшин яшьләрнең остазлары булачак.
Проектның беренче этабында яшүсмерләр татар һәм рус телләрендә пьеса язачак. Ә остазлары, үз чиратында, катнашучыларга геройлар табарга, сюжет төзергә ярдәм итәчәк, шулай драматургия текстын язу серләре белән дә бүлешәчәк.
Юрий Клавдиев инде 10 елдан артык Class act технологиясе белән эш итә. Кира Малинина төрле театраль техникалар буенча мөгаллим, инде икенче тапкыр шушы проектта катнаша. Ә шагыйрь Рүзәл Мөхәммәтшин өчен бу проект драматургия лабораториясендә эшләү буенча беренче тәҗрибә.
Искәртеп үтәбез: «Классная драма» театр лабораториясенең спектакль-альманахын Г.Камал һәм Яшь тамашачылар театрында 29 августта күрсәтәчәкләр.
сылтама:
http://intertat.ru/tt/madaniyat-tt/item/47289-tatarstanda-yash-dramaturglar-yaryishachak.html
Комментарий юк