«Тантана» премиясен кемнәр алды?

Бүген Г. Камал исемендәге Татар дәүләт Академия театрында Татарстан республикасы Мәдәният министрлыгының «Тантана–2021» театр премияләрен тапшыру тантанасы үтте. «Тантана» – театр сәнгатендәге иҗади һәм иҗтимагый казанышлары өчен театр әһелләренә бирелә торган профессиональ премия. Ул ел саен Камал театры сәхнәсеннән Халыкара театр көнендә тапшырыла. 
Узган ел театрлар өчен дә шактый катлаулы ел булды. Пандемия аркасында заллар башта бөтенләй бушап калды, аннан яртылаш кына тутырырга рөхсәт ителде. Узган ел хәтта «Тантана» премияләре дә онлайн-режим да гына тапшырылды. 
Боларның барысына да карамастан, театрлар тамашачыларны яңа премьералар белән куандырдылар. 
Инде менә уңышларны барлар чак килеп җитте. 

Мәртәбәле жюри карары белән «Иң яхшы хатын-кыз роле» номианциясендә җиңүче дип Ләйсән Фәйзуллина табылды (Г. Камал театры, «Хуш авылым» спектакле).

«Иң яхшы ир-ат роле» номинациясендә җиңүче дип Эмиль Талипов исеме аталды (Г. Камал театры, «Хуш авылым» спектакле).

«Намус һәм тугрылык» номинациясендә премиягә Хәлим Җәләлов (Г. Камал театры) һәм Геннадий Прытков (Качалов театры) лаек булдылар.  

«Иң яхшы эпизодик роль» номинациясендә премияне Резеда Сәлахова алды (Тинчурин театры, «Сәйдәш. Йокысызлык» спектакле өчен).

 
Шамил Закиров исемендәге премия Г. Камал театры тегүчесе Наилә Ваһаповага бирелде. Ул – Камал театрының элеккеге директоры истәлегенә Салават Фәтхетдинов тапшыра торган  традицион премия.  Җырчы аны ел саен шушы көндә Камал театры хезмәткәрләренең берсенә тапшыра. Әлеге хезмәткәр театрда инде ким дигәндә 25 ел эшләгән булырга тиеш. Премиянең күләме Шамил Закировның яше белән бәйле рәвештә гел артып бара. Быел ул 76 мең.