«Сөембикә» - шәп журнал!

ГӨЛШАТ ГЫЙЗЗӘТУЛЛИНА:

Мин үзем Балтачтан, Янгул авылында яшим. Ирем Рәфкать хуҗалык эшендә, үзем – сатуда. Менә иртүк Агропромпаркка казлар алып килдек. Бүген биредә күңеллерәк тә әле. Музыка уйный, яраткан җырларыбызны яңгыраталар. Өстәлләрдә үзебез, балаларыбыз укый торган журналлар тезелеп тора. Һәр шимбә саен биредә газета-журналларга язылу оештырыла икән. Язылган кеше татар радиосы аша якыннарына сәлам дә юллый ала... Күзем шундук «Сөембикә»ләргә төште. Соңгы саннарын укырга ничектер җай чыкмаган иде. Укырга гына алып торыйм дип, килеп октябрь санын ачсам – үзебезнекеләр! «Төп йорт килене» дигән язмадан балалары белән Булат һәм Фирая Зыятдиновларны күреп алдым! Бакый абый, белән Мәдинә апаныкылар! И рәхәт булып китте инде! Минем әни гел алдыра ул журналны. Карадуганга кайткан саен аның журналларын шудырып кына алып китәм. Яшьтән үк укырга яратам. Яшь чакта да өй җыештырганда да, тузан сөрткәндә дә, берәр китап күрсәм, туктап, дөньямны онытып, укый башлый идем. И үземә язылам әле болай булгач дип күңелемә беркетеп куйдым. Кызыбыз Гүзәл Түнтәрдә кияүдә, почтада эшли. Оныкларыбыз Данияр белән Илданур үсеп килә. Берсенә 3 яшь, бәләкәенә 1,5 яшь. Кызыксынмаганнары юк! «Салават күпере»н шул балаларга бүләк итәрмен.

Иң беренче булып «Сөембикә» журналына мин язылдым! Якыннарыгызга әйтер сүзегез бардыр, бәлки, диләр. Бар шул! Улым Әсхәт Ерак Көнчыгышта хезмәт итә, тиздән туган көне. Сагынуларымны салып, дулкынлана-дулкынлана котлау сүзләремне кабатладым. Ишетмәгәнен дә беләм, еракта бит. Барыбер дә әни кешенең изге теләге булып яңгырады ул. Әниемне тиздән булачак Әниләр көне белән дә котлап куйдым. Аннары «Сөембикә» журналын чыгаручыларга рәхмәт җиткердем. Бик әйбәт журнал! Яратып укыйбыз!