Салават Миңнеханов: Артистларыбызга җылы киенеп йөрергә киңәш иттек

Салават Миңнеханов белән Гүзәлем дуэты башка артистлардан оригиналь булуы, һәр чыгыштан зур шоу ясавы, һәрвакыт яңалыкка омтылуы белән аерылып тора. Иҗади гаилә быелгы "Син һәм мин" исемле концерт  программасында тамашачыны ничек шаккатырырга җыена икән?

– Быелгы программаның төп яңалыгы шул: концертта тулысынча җанлы музыка яңгыраячак. Узган елгы "Телепортация"дә сәхнәдә үзебез генә басып торсак (тамаша компьютер графикасына нигезләнде), монысында сәхнәдә берьюлы 15 кеше булачак. Әлбәттә, быелгы концерт катлаулырак та, җаваплырак та. Төрле шәһәр-районнарда гастрольләребез көтелә, шуңа да безнең алда составны тулы килеш саклау бурычы тора. Музыкант һәм биючеләргә һич кенә дә авырмаска, җылы киенеп йөрергә киңәш иттек, - дип сөйләде Салават Миңнеханов.

– Салаватка кияүгә чыкканчы ук, ул миңа иҗат итәргә, сәхнәгә күтәрелергә ярдәм итте. Быел аның белән гаилә коруыбызга өч ел тулды һәм менә инде өченче ел рәттән без уртак концертыбызны тәкъдим итәбез. Тәүге программабыз "Парлы шоу" дип аталган иде. Ә быелгы концертны инструменталь ансамбль белән оештырырга насыйп булды. Бу – минем идея, хыялымның тормышка ашуына сөенеп туя алмыйм. Дөресен генә әйткәндә, кайсы артист белән аралашма, һәркайсы инструменталь төркем белән концерт куярга тели, әмма бу зур чыгымнар таләп итә. Шулай да озак кына уйлаганнан соң тәвәкәлләргә булдык, – ди Гүзәлем.

Ноябрь башында беренче концерт – Мөслимдә , аннан соң Сарман, Азнакай, Чаллы, Алабуга, Лаеш, Нурлат, Әлмәт, Лениногорск, Олы Әтнә, Арча, Балтачта көтелә.

сылтама: http://intertat.ru/