Рөстәм Миңнеханов: “Югары тизлекле магистраль проекты быел әзер була”

Хәзерге заман Россия тарихындагы иң эре траспорт проектларының берсе – югары тизлекле тимер юл магистрален төзү буенча проектлау эшләре тәмамлана. Бу хакта Татарстанның әйдәп барган электрон ММЧлары мөхәррирләре белән традицион очрашуда ТР Президенты Рөстәм Миңнеханов хәбәр итте. Быел ук документлар һәм аның буенча исәпләүләр гавами тыңлауларга тәкъдим ителәчәк.

“Проектлау-тикшерү эшләре бара. Гавами тыңлаулар үткәрелсен өчен проектны тәкъдим итү, экологик экспертиза алу кирәк. Биредә бик җитди эш алып барыла, трасса юнәлешен дә экологиягә мөмкин кадәр ким зыян сала торган итеп төрлечә карадык”, - дип белдерде Рөстәм Миңнеханов.

“Мөмкинлектән файдаланып әйтәсем килә – бу революция. Казанның шундый күренекле транспортлы булуы да безнең ментальлекне үзгәртә, җәлеп итүчәнлегебезгә яңа мөмкинлекләр ача. Русларга Богтан, татарларга Аллаһыдан сорарга кирәк: бу проект республикабызга бик кирәк”, - дип саный Татарстан Президенты.

“Бөтен карарлар да үлчәп кенә, булган экологик нормалар кысаларында кабул ителәчәк. Ләкин нинди генә башлангыч булмасын, аны каралтып, таптарга торган кешеләрне аңламыйм мин. Болай дөрес түгел ләбаса! - диде республика лидеры. – Әйе, безгә аерым коридор ясарга кирәк була, һәм без эстакада итеп үтәчәкбез. Бөтен дөньяда шулай хәрәкәт итәләр. Шушы мәсьәләләрне хәл итүдә компенсацион мөмкинлекләр бар. Аның кирәкме-юкмы икәнлеге турындагы мәсьәлә бөтенләй дә каралмый. Бу эшне иң ким зыян белән эшләргә кирәк була, ләкин тулаем республика, башкалабыз кешеләре һәм кунакларыбыз өчен бу мөһим. Магистраль бәрабәренә Казанның җәлеп итүчәнлеге бөтенләй башкача, мөмкинлекләре дә бүтәнчә булачак”.

Проектны гамәлгә ашырганнан уңайлыклар гына түгел, икътисади файда булуы да бик әһәмиятле, дигән фикердә Татарстан Президенты: “Югары тизлекле магистраль узачак төбәкләргә – Владимир, Түбән Новгород, Чабаксарга инвестицияләнәчәк гаять зур акчалар ул. Шушы инвестицияләрнең нәтиҗәләре гаять зур, шуңа күрә монда сезнең ярдәмегез кирәк була. Бу мәсьәләдә без очрашып, барысы белән дә фикерләшергә әзер, - дип мөрәҗәгать итте республика лидеры татарстанлыларга. – “Быел ук проект әзер була. Аны расларга, барлык экологик мәсьәләләрне хәл итәргә кирәк була. Бу проект тормышка ашар дип өметләнәм”.

сылтама - http://tatar-inform.tatar/