“Хәзинә” милли сәнгать галереясендә үзенчәлекле күргәзмә ачылачак. Биредә халык шагыйре, Россиянең дәүләт бүләге һәм Г.Тукай премиясе лауреаты Ренат Харисның график хезмәтләре белән танышырга мөмкин булачак.
Мәгълүм булганча, Ренат Харис киң җәмәгатьчелеккә шагыйрь һәм җәмәгать эшлеклесе буларак танылган шәхес. Ул – кырыктан артык китап авторы, әсәрләре бик күп телләргә тәрҗемә ителгән. Иҗаты җиде томда дөнья күрде. Ренат Харисның шигырьләренә композиторларыбыз 150дән артык әсәрләр иҗат итте. Р.Харис дөньякүләм атаклы шагыйрьләрнең шигырьләрен татар теленә тәрҗемә итә, шул исәптән якташыбыз Гавриил Державинның әсәрләрен дә.
6 майда Ренат ага 75 яшьлеген билгеләп узарга җыена. Шагыйрь-рәссам Бөек Ватан сугышы башланган елны укытучылар гаиләсендә дөньяга аваз салган. Юбилее уңаеннан Харис халыкны үзенең икенче таланты – график хезмәтләре белән таныштырырга ният кылды. Хәер, 1997 елны инде ул рәссам буларак үзен таныткан иде: М.Горькийның әдәби-мемориаль музеенда аның беренче күргәзмәсе узган иде.
Рәсем сәнгате белгечләре Р.Харисның иҗатын югары бәяли. Материал белән эшли белә, композицияне дөрес күзаллый, масштаблы фикерли ала – әлеге сыйфатлар барысы да җитлеккән оста сыйфатлары. Туган як гүзәллеген аеруча матур тасвирлый. Башкаларда да нәфислеккә карата мәхәббәт тәрбияли.
7 апрель көнне “Хәзинә” милли сәнгать галереясендә 16.00 сәгатьтә ачылачак күргәзмәдә Ренат Харисның 60 тан артык график хезмәтләре урын ала. Проект 2016 елның 10 маена кадәр эшлиячәк, дип хәбәр итә чараны оештыручылар.
сылтама:
http://intertat.ru/
Комментарий юк