Әмир Камалиев вафат

Бүген танылган артист, драматург, язучы Әмир Камалиев вафат. Аманулланың (иҗади тәхәллүсе шулай иде) Камал театры сәхнәсендә куелган "Әлепле әртистләре", "Кылый Кирам балдагы", "Әле кичә генә яз иде" әсәрләрен бик яратып кабул иткән идек. Чаллы, Түбән Кама театрлары да үз итте аның сәхнә әсәрләрен. Театр сөючеләр аны 1989 елдан - Мәскәүдә М.Щепкин исемендәге театр училищесын тәмамлап кайтып, Г. Камал исемендәге татар дәүләт академия театрында эшли башлаган елдан бирле белә. 1995 нче еллардан ул  режиссерлык өлкәсендә булды.
Быелның 29 маенда аңа бары 59 яшь кенә тулган булган... Якыннарының, туганнары, дусларының авыр кайгысын уртаклашабыз. Аллаһы Тәгалә барлык гөнаһларын кичереп, урынын җәннәтләрдән итсен.