ТР Дәүләт Киңәшчесе, "Яңарыш" фондының Попечительләр советы рәисе Минтимер Шәймиев бүген Казан Кремлендә Россиянең танылган педиатры һәм хирургы, җәмәгать эшлеклесе, профессор, медицина фәннәре докторы, Мәскәүнең кичектергез балалар хирургиясе һәм травматология фәнни-җитештерү институты директоры Леонид Рошаль белән очрашты.
Очрашуда ТР Дәүләт Советы Рәисе урынбасары, "Яңарыш" фонды башкаручы директоры Татьяна Ларионова, ТР сәламәтлек саклау министры Гадел Вафин, Татарстан Республикасы медицина хезмәткәрләре ассоциациясе президенты Ирина Питулова да катнашты, дип хәбәр итә ТР Президенты матбугат хезмәте.
Леонид Рошаль Казанга бүген "Пирамида" комплексында узачак "Ел табибы - Ак чәчәкләр" республика конкурсында җиңүчеләрне бүләкләү тантанасында катнашу өчен килде. Ул шулай ук Татарстандагы беренче балалар хосписы белән танышырга да ниятли.
"Минем Татарстанны яратуым берәүгә дә сер түгел, тормышымда Татарстан белән бәйле хатирәләр шактый. 1941 елда мин Чистайда мәктәпкә кердем. Сездә медицина бик көчле, яхшы кадрлар әзерләгәнсез. Әмма һәр чорга - үзенеке, һәрчак яхшыдан яхшы булуны телибез. Татарстанда сәламәтлек саклауга күрсәткән игътибар - үрнәк алу өчен мисал. Татарстанда бик күп яңа һәм кызыклы эшләр башкарыла", - дип билгеләп үтте Леонид Рошаль.
Минтимер Шәймиев кунакка республикага ярдәм иткән өчен рәхмәт белдерде: "Сезнең Медицина хезмәткәрләре көне алдыннан килүегез мөһим. Һәр бәйрәмне кунаклар бизи, ә сезнең кунак булып килүегез - бәйрәмне бизәү дә, медицина хезмәткәрләренә, республикага хөрмәт тә. Казанга килгән вакытта яки төрле форумнарда катнашканда очрашканда, сез, сугыш елларын искә алып, һәрчак Татарстанга рәхмәт белдерәсез, ул чакта республика күп кешләрне үзенә сыендырды", - дип билгеләп үтте Минтимер Шәймиев.
сылтама:
http://tat.tatar-inform.ru/news/2015/06/19/110582/
Комментарий юк