Менделеевск районында барлык 37 сайлау участогы да эшли

Менделеевск районында сайлаулар 37 сайлау участогында үтә. Барлык сайлаучылар саны 21 мең 882 кеше. Бу хакта ТР ҮСКның Мәгълүмат үзәге хәбәр итә.

Шәһәрнең яңартылган «Химик» спорт-сәламәтләндерү комплексында 1903 һәм 1905нче сайлау участоклары урнашкан. 1903нче санлы сайлау участогында гражданлык бурычын үтәргә беренче булып район җәмәгать тормышында активистка булган Гөлнара Таһирова килде. Өч егет һәм кыз быел беренче тапкыр сайлауда катнашты.

Өйдә сайлаучылар бик аз: территориаль сайлау комиссиясе рәисе Лилия Нәфыйкова сүзләренчә, сәгать 11гә булган мәгълүмат буенча, бары ун менделеевлы гына заявка калдырган.

1085 һәм 85 кеше – болар шундый аерма белән 1907 һәм 1922нче сайлау участогында тавыш бирүчеләр саны. Сайлау участоклары Менделеевскиның 4нче мәктәбендә һәм Туймә бистәсе клубында урнашкан.

1907нче сайлау участогына килгән Нәсимә Гобәйдуллина Л. Карпов исемендәге химия заводы ветераны. «Бер генә сайлауны да калдырмыйм мин, – дип сөйли ул. – Тыныч тормышта яшәвебезгә сөенеп туялмыйм, районыбызның һәм республиканың чәчәк атуын телим».

чыганак - http://tatar-inform.tatar