Мария Киселева су өстендәге шоуга чакыра

Өч тапкыр Олимпия уеннары чемпионы, өч тапкыр дөнья чемпионы, тугыз тапкыр Европа чемпионы, атказанган спорт мастеры Мария Киселеваның су өстендәге шоуы быел “Салтан патша турында әкият” дип атала. Ул Яңа ел каникуллары вакытында – 2018 елның 2 - 7 гыйнварында Казанда Спортның су төрләре буенча сараенда узачак.
Шоу параллель рәвештә Мәскәү, Санкт-Петербург, Казан шәһәрләрендә барачак. Казанда барлыгы 18 спектакль көтелә. Киселеваның үзе әйтүенә караганда, болар аның иң яраткан шәһәрләре.

Спектакль А.С. Пушкинның мәгълүм әкиятенә нигезләнгән. Шоу суны, коры җирне һәм һаваны берләштерә. Баш режиссер – Алексей Малыхин. Спектакльгә музыка махсус язылган, гәрчә Римский-Корсаковның колакка таныш ноталары да яңгыраячак.

Төп рольләрдә Мәскәү артистлары катнашса, синхрон йөзү, суга сикерү, хореография буенча катнашучыларны Казан һәм Яр Чаллыдан кастинг белән сайлап алганнар. Шулай ук әкияттәге мәгълүм 33 баһадир да булачак. Нәни спортчылар да чыгыш ясаячак. “Безнең шоуның максаты спортның су төрләрен популярлаштыруга хезмәт итә, шуңа да катнашучыларны урыннардан сайлап алабыз”, - диде бу җәһәттән Олимпия уеннары чемпионы. Шоу көннәрендә, гадәттәгечә, Мария Киселевадан мастер-класслар да алырга мөмкин булачак.