Көзге ярминкәләрдә сатылачак авыл хуҗалыгы продукциясенең бәяләре билгеле булды

Быел Казанда авыл хуҗалыгы ярминкәләре үткәрү өчен 10 мәйдан билгеләнгән, Чаллыда - өч. Шулай ук Яшел Үзән районында "Яңа Тура" технополисы мәйданчыгында да сәүдә оештырылачак.

2015 елда Казанда һәм Чаллыда 34 авыл хуҗалыгы ярминкәсе үткәрелде, аларга 1,5 млрд сумнан артык продукция китерелде дип искәртте министрның беренче урынбасары. Моннан тыш, агымдагы елның язында 17 ярминкә оештырылды.

"Быел Татарстан Президенты йөкләмәсе буенча крестьян-фермерлык һәм шәхси ярдәмче хуҗалык продукциясен көн саен сату өчен 7 сәүдә мәйданчыгы төзелә һәм төзекләндерелә", - диде Титов.

Татарстан Министрлар Кабинеты Баш ветеринария идарәсе башлыгы Алмаз Хисаметдинов итне һәм ит продукциясен ярминкәгә районнарда ветеринария-санитар экспертиза үткәч кенә алып килү рөхсәт ителә диде. Ул бушлай үткәреләчәк. "Итне элгечләргә эленгәч килеш алып килергә, автомобиль транспорты санитар эшкәртү узарга тиеш", - дип ачыклык кертте ул.

Ярминкәдә хуҗалыклардан сөт сату рөхсәт ителә. Сәүдә урыннарында сөтне куллану алдыннан кайнатырга кирәклеге турында язулар булырга тиеш. Сөтне кранлы термосларда алып килергә кирәк. "Казанның һәр мәйданчыгында ветеринария хезмәте вәкиле куелган таләпләр үтәлешен тикшерәчәк", - дип ышандырды Баш ветеринария идарәсе башлыгы.

Киңәшмәдә продукцияләрне нинди бәядән сату буенча тәкъдимнәр белдерелде. Аерым алганда, кош итенең килосы 115 сум, күркә ите - 235, сыер ите - 250-300, дуңгызныкы - 230-270, сарык ите - 320-380, югары категорияле йомырканың дистәсе - 45-55 сум, сөтнең литры - 28-30 сум, каты сырлар - 280-330, атланмай - 300 сум, шикәр комы - 44 сум, югары сортлы он - 20 сум, карабодай ярмасы - 49 сум, бәрәңге - 10 сум, кишер - 12-15 сум, кызыл чөгендер - 12-15 сум, суган - 17-18 сум, кәбестә - 8-10 сум, бодай - 9 сум, арпа - 8 сум, арыш - 6 сум, балык (карп) - 150 сум.

чыганак - http://tatar-inform.tatar/