​Кышның икенче яртысына һава торышы билгеле булды

  Быелгы кыш явым-төшемгә бай. Ул нормадан 128–222% ка артып киткән. Кар көртләре биеклеге 65 сантиметрга җитте. «Дөрес, алар, нигездә, Казанда һәм  республиканың көнбатыш районнарында гына», – дип сөйләде бүген «Татар-информ» агентлыгында узган матбугат очрашуында Татарстанның Гидрометеоүзәге башлыгы Феликс Гоголь.  

Быелгы кышның тагын бер үзенчәлеге: җепшек көннәрнең булмавы. Шуңа да кар көртләре өелде, дип аңлата белгечләр. Кырлач ае булуга карамастан, кырлач салкыннары әлегә күренми. Гадәттә, кач ману көннәрендә салкын була иде. «Быел зәмһәрир суыклар булмаячак», – дип белдерде метеофараз бүлеге башлыгы Ирина Трущина.  

Ялларда һава температураcы -4 +1 дән түбән төшмәячәк, карлы яңгыр, җил булуы көтелә. «Узган тәүлекләрдәге кебек бураннар булмый», – дип тынычландыра безне белгечләр.   

Кышның икенче яртысында да һава температурасы нормадан артмаячак дип фаразлана. Ә ул исә  гыйнвар аенда -13, февральдә -12,  мартта -5-7 градус тирәсе. Ирина Трущина аңлатуынча, безнең республика төньяк циклон астында. Ә ул арктик салкыннарга үтеп керергә ирек бирми. Шуңа да  температура нормадан түбән төшми.