Соңгы вакытта Татарстанда кыргый үсемлекләр белән агуланучылар саны кискен генә арта башлаган. Шуңа күрә республиканың Роспотребнадзор идарәсе халыкны, бигрәк тә ата-аналарны игътибарлы булырга чакыра.
Җаваплы идарәчелек китергән мәгълүматларга караганда, агымдагы елда республикада барлыгы 8 шундый очрак теркәлгән. Әлеге гадәттән тыш хәлләрнең өчесе – Казанда, тагын өчесе – Чаллыда килеп чыккан. Апас һәм Буада исә берешәр очрак теркәлгән. Агуланучыларның икесе – балалар.
Балагызны саклагыз
Калган очракларга килгәндә, араларында икътисади яктан актив халык белән беррәттән пенсионерлар да бар. Бактың исә, барлык агулануларның 25 проценты үз-үзеңне дәвалау нәтиҗәсендә килеп чыккан икән. Халык дару үсемлекләре белән дәваланам дип үз сәламәтлегенә тагын да зуррак зыян салган. Кагыйдә буларак, быелгы очраклар канлы үлән (чистотел) һәм кастор маен куллану белән бәйле.
Агулануларның тагын 50 проценты исерү максатыннан чемерица үсемлеген куллану нәтиҗәсендә килеп чыккан. Агулы үсемлек корбанына әверелүчеләрнең тагын 25 проценты ялгыш үләннәр файдалану нәтиҗәсендә агуланган. Балаларга килгәндә исә, бу – 9 айлык һәм 6 яшьлек нәниләр. Алар билгеле булмаган үлән ашаган дип фаразланыла.
Шуңа күрә Татарстанның Роспотребнадзор идарәсе халыкны, бигрәк тә ата-аналарны игътибарлы булырга чакыра. Балаларның кыргый үсемлекләр белән агулануы нәкъ менә ата-аналарның игътибары җитеп бетмәү нәтиҗәсендә килеп чыга ди.
Күбрәк ирләр агулана
- Табигатьтә балаларны караучысыз калдыру катгый тыела. Кыргый үләннәр белән дәваланырга тырышу да файда урынына фаҗига китереп чыгарырга мөмкин. Кыргый үләннәрдән эшләнгән дару препаратларын тиешле күләмдә генә кулланырга кирәк, - дип белдерәләр Роспотребнадзор идарәсендә.
Шунысын да билгеләп үтәбез: 2014 елда Татарстанда кыргый үләннәр белән агулануның 31 очрагы теркәлгән булган. Кагыйдә буларак, бу - кастор үләне (клещевина), бакра (кукольник), тилебәрән (белена), миңгерәткеч (дурман), бөтнек мае (мята), аконит төнәтмәсе, рицин орлыклары. Агуланучыларга килгәндә исә, аларның 80,7 проценты – ирләр булса, 19,3 проценты – хатын-кызлар. Араларында балалар һәм яшүсмерләр дә бар.
фото: https://pixabay.com
сылтама: http://intertat.ru/tt/society-tt/item/45588-kyirgyiy-%D2%AFl%D3%99nn%D3%99r-bel%D3%99n-agulanmas-%D3%A9chen.html
Следите за самым важным и интересным в Telegram-каналеТатмедиа
Комментарий юк