Татарстан Республикасының туристлык буенча Дәүләт комитеты Болгарда төзелүче яңа кунакханәгә исем уйлап табу буенча бәйге игълан итә.
Шәхри Болгарда кунакханәләр – караван-сарайлар – унынчы гасырда ук булган. Ераклардан Болгарга килгән юлчылар шунда туктаган, ял иткән. Сөйләшү-аралашу, элемтәләр урнаштыру, сәүдә килешүләре төзү – болар барысы да шушы кунакханәләр диварында үткән. Караван-сарайлар килүчеләр өчен карантин үтү урыны да булган: йогышлы чирләрдән каланы шулай саклаганнар...
Узган елның шушы чоры белән чагыштырганда быел Болгарга туристлар килү 40 процентка арткан. Казанда су спорты төрләре буенча Дөнья чемпионаты барган көннәрдә генә дә Болгар тыюлыгы 60 мең кунакны кабул иткән.
Яңа кунакханә комплексы исә Болгар шәһәрчеген озаклап, иркенләп, ашыкмыйча карарга мөмкинлек бирәчәк. Читтән кайтучылар ата-баба туфрагында, тарихи Ватаннарында таң каршылап, бу якларның табигатенә дә сокланып китә алачак. Кунакханә янында нәкъ үткән чорлардагыча Ак мунча эшләячәк...
Кунакханәнең исемендә бу тарихи җирлек чагылырга тиеш. Ул исем кунакларны чакырып, тартып торсын, ерактан танылсын.
Үзегез тәкъдим иткән исемнәрне 2015 елның 1 октябренә кадәр җибәрә аласыз. Җиңүчене 1 ноябрь көнне игълан итәчәкләр. Кунакханә төзелеп беткәч (ә аның ишекләре 2017 елның җәендә ачылыр дип көтелә), җиңүче өч көн шушы кунакханәдә иң кадерле кунак булачак. Бүләкләр бу гына түгел әле...
Бәйгенең шартлары белән якыннанрак танышу өчен:
http://tourism.tatarstan.ru/rus/konkurs_bolgar.htm
Комментарий юк