Красноярскида «Сөембикә» архивы

«Cөембикә» журналын читтә укучы милләттәшләребез булуга аеруча шатланабыз. Кызганыч, алар күп түгел, әмма һәрберсе энҗе бөртегенә тиң. Без аларны һәрвакыт барлап, артканнармы, азайганнармы санап торабыз. Әлбәттә, аларның һәрберсе белән якыннан танышасыбыз килә. Редакциягә шалтыраталар икән. Бик шатланып озаклап сөйләшәбез. 

«Авито»да  1980–2000 елларда чыккан «Азат хатын», «Сөембикә» журналлары архивын сату турындагы белдерүне күрдек тә, куандык та, бераз моңсу булып та китте. Кызыксынып белдерү биргән кешегә Красноярсига шалтыраттык. Баксаң, оныгы әбисенең китапханәсен сата икән.

«Ул сезнең журналны укый иде. Әби вафат булды. Аның фатирын, җыйган китап-журналларны сатам», – диде ул кыска гына. Аның артык сөйләшәсе килми иде. Шуңа күрә әбинең исемен дә белә алмый калдык. Әмма оныгының безнең журналларны чыгарып атмавына, аны сатуга куюына шатландык.

Журналларны сатып алырга теләп шалтыратучылар барлыгын әйтте телефонның теге башындагы ир-ат. Красноярсида үскән ирнең журналларның нинди кыйммәткә ия булуын белүе бик сөенечле. «Сөембикә» архивы милләт җанлы кешеләргә барып ирешсен иде.

Исегезгә төшерәбез, «Сөембикә» журналының хәзерге саннарын Wildberries, Kazan Express, Ozon, «Татмедиа» онлайн кибетеннән  сатып алырга була.